نۇرسۇلتان نازاربايەۆ تۇركى تىلدەس ەلدەرگە ۇندەۋ جولدادى
پرەزيدەنتتىڭ ايتۋىنشا، بۇگىنگى الەمدە گەوەكونوميكالىق احۋال ءبىرشاما وزگەردى. حالىقارالىق قاتىناستار دا شيەلەنىسە ءتۇستى. سەبەبى سانكتسيا مەن ساۋدا باسەكەسى قىزىپ تۇر. قارجى نارىعى وزگەرىپ، ينۆەستيتسيالار ازايدى.
«قاۋىپسىزدىك سالاسىندا دا قاتەرلەر كۇشەيدى. ولار - تەرروريزم، ءدىني ەكسترەميزم، ۇيىمداسقان قىلمىس، زاڭسىز ميگراتسيا جانە ەسىرتكى تاسىمالى. اتالعان سىن-تەگەۋرىندەر تۇركى دۇنيەسىنە دە اسەر ەتپەي قويمايدى. سوندىقتان بۇنىڭ بارلىعى بىزدەن كەشەندى ءىس-شارالاردى قولعا الۋدى تالاپ ەتەدى. تۇركى كەڭەسى اياسىنداعى ىنتىماقتاستىق پەن كۇش-جىگەر ءوزارا دامۋ ءۇشىن قولايلى جاعداي جاساۋعا مۇمكىندىك بەرەدى»، - دەدى ن. نازاربايەۆ تۇركى كەڭەسىنىڭ VI سامميتىندە.
مەملەكەت باسشىسىنىڭ سوزىنە قاراعاندا، تۇركى كەڭەسىنە مۇشە مەملەكەتتەر اراسىنداعى ساۋدا-ەكونوميكالىق قاتىناستاردى ناقتى ىستەر ارقىلى تەرەڭدەتۋ كەرەك.
«ەڭ الدىمەن، ەلدەرىمىزدىڭ ترانزيتتىك الەۋەتىن تولىققاندى پايدالانۋىمىز قاجەت. ءبىز - ءبىر بەلدەۋدىڭ بويىنداعى باتىس پەن شىعىستى، سولتۇستىك پەن وڭتۇستىكتى جالعاستىرۋشى التىن ارقاۋ بولاتىن ەلدەرمىز. جاقىندا اقتاۋ قالاسىندا قابىلدانعان كاسپيي تەڭىزىنىڭ قۇقىقتىق مارتەبەسى تۋرالى كونۆەنتسيا ءوڭىرىمىزدىڭ ترانزيتتىك الەۋەتىن ارتتىرۋعا سەرپىن بەرەتىنى انىق. وسى سالاداعى ءىس- قيمىلىمىزدى ۇيلەستىرۋ كولىك- ترانزيتتىك جولدارىمىزدىڭ تيىمدىلىگىن ەسەلەۋگە مۇمكىندىك بەرەر ەدى. سوندىقتان تۇركى كەڭەسى مەملەكەتتەرىنىڭ كولىك مينيسترلەرى مەن تەڭىز اكىمشىكتەرىنىڭ كەزدەسۋى اياسىندا تاريفتىك جانە ساياسي- اكىمشىلىك راسىمدەرىن جەڭىلدەتۋ جولىندا بەلسەندى جۇمىس جۇرگىزۋ كەرەك»، - دەپ اتاپ كورسەتتى ن. نازاربايەۆ.
قازىردىڭ وزىندە تۇركى ەلدەرىنىڭ كولىك- ترانزيتتىك الەۋەتىن ارتتىراتىن باعىتتار بار. ماسەلەن، كاۆكاز ارقىلى جۇرەتىن تەمىرجول اشىلعان. قازاقستان جاعىندا قۇرىق جانە اقتاۋ تەڭىز پورتى ميلليونداعان توننا جۇكتەردى وتكىزە الادى.
«وعان قوسا، قازاقستان، تۇرىكمەنستان مەن يران ارقىلى پارسى شىعاناعىنا شىعاتىن تەمىرجول ىسكە قوسىلعان. سوسىن قىتايدىڭ شىعىسىنان كونتەينەرلەردى قازاقستانمەن كاسپيي ارقىلى ەۋروپاعا جەتكىزىلۋى ءبىز ءۇشىن جاڭا مۇمكىنشىلىك، ونى پايدالانىپ، ساۋدا-ساتتىعىمىزدى كۇشەيتۋگە ابدەن بولادى»، - دەدى ن. نازاربايەۆ.
بۇدان بولەك، قازاقستان پرەزيدەنتى تۇركى تىلدەس ەلدەردى «استانا» حالىقارالىق قارجى ورتالىعىنىڭ جۇمىسىنا اتسالىسۋعا ۇندەدى. سەبەبى اتالعان ورتالىق ارقىلى وڭىرگە ينۆەستيتسيا مەن كاپيتالدى كوپتەپ تارتۋعا بولادى.
ايتا كەتەيىك، بۇگىن ىستىق كولدىڭ جاعاسىندا تۇركى ەلدەرى ىنتىماقتاستىق كەڭەسىنىڭ VI سامميتى ءوتتى. بيىلعى سامميتتىڭ تاقىرىبى - «جاستار ساياساتى جانە ۇلتتىق سپورت تۇرلەرى سالاسىنداعى ىنتىماقتاستىق». وعان قازاقستان، قىرعىزستان، تۇركيا، ءازىربايجان، وزبەكستان مەن ماجارستاننىڭ باسشىلارى قاتىستى.
