نۇرسۇلتان نازاربايەۆ تۇركى كەڭەسىنىڭ سامميتىن اشتى
«جاستار ساياساتى جانە ۇلتتىق سپورت تۇرلەرى سالاسىنداعى ىنتىماقتاستىق» تاقىرىبىنداعى بيىلعى سامميتكە كەڭەسكە مۇشە قازاقستان، قىرعىزستان، تۇركيا مەن ازەربايجان پرەزيدەنتتەرى قاتىسۋدا. سونداي-اق، جيىنعا وزبەكستان پرەزيدەنتى شاۆكات ميرزيەيەۆ پەن ماجارستاننىڭ پرەمەر-ءمينيسترى ۆيكتور وربان كەلدى.
وتىرىس شىڭعىس ايتماتوۆ اتىنداعى مۋزەيدە وتۋدە. سامميتى ق ر پرەزيدەنتى نۇرسۇلتان نازاربايەۆ اشتى.
«تۇركى تىلدەس ەلدەرى ىنتىماقتاستىق كەڭەسىنىڭ كوپتەن كۇتكەن سامميتىندە سىزدەرمەن كەزدەسىپ وتىرعانىما وتە قۋانىشتىمىن. ەڭ الدىمەن قىرعىز ەلىنىڭ جاۋھارى - ىستىق كولدىڭ جاعاسىندا قوناقجاي كوڭىلمەن قارسى العان قىرعىز ەلى مەن ونىڭ پرەزيدەنتى سوورونباي جەەنبەكوۆكە ايرىقشا العىسىمىزدى بىلدىرەمىز. سونىمەن قاتار، ارامىزدا وتىرعان وزبەكستان پرەزيدەنتى شاۆكات ميرومون ۇلى ميرزيەيەۆكە قوش كەلدىڭىز دەيمىز. بۇگىنگى جيىنعا ارعى بابالارى تۇركى تەكتەس ماجارستاننىڭ پرەمەر-ءمينيسترى ۆيكتور وربان مىرزانىڭ قاتىسىپ وتىرعانىن ەرەكشە اتاپ وتكىم كەلەدى. قادىرلى قوناقتاردىڭ بۇگىنگى باسقوسۋعا كەلۋى تۇركى كەڭەسىنىڭ اياسى كەڭەيىپ، ماڭىزى ارتقانىن كورسەتەدى. سامميتتە قول جەتكىزگەن ۋاعدالاستىق پەن شەشىمدەردىڭ ارقاسىندا ءوزارا ىنتىماقتاستىعىمىز بەن باۋىرلاستىق بايلانىستارىمىز ودان ارى ارتادى دەگەن سەنىمدەمىن»، - دەدى ەلباسى.
سامميت بارىسىندا ءبىرقاتار قۇجاتتارعا قول قويىلادى. سونداي-اق، كەڭەس مۇشەلەرى شولپان-اتا دەكلاراتسياسىن قابىلدايدى دەپ جوسپارلانۋدا. ال ۇيىمنىڭ باس حاتشىسى قىزمەتىنە قازاقستاننىڭ وكىلى سايلانادى. مەملەكەت باسشىسى تۇركى كەڭەسىنىڭ ءتوراعالىعىن رەسمي تۇردە قىرعىزستانعا تاپسىرادى.
ايتا كەتەيىك، تۇركى ەلدەرىنىڭ ىنتىماقتاستىق كەڭەسى ق ر پرەزيدەنتى نۇرسۇلتان نازاربايەۆتىڭ باستاماسىمەن قۇرىلعان بولاتىن. كەڭەستىڭ العاشقى سامميتى 2011-جىلى الماتى قالاسىندا ءوتتى. ۇيىمنىڭ نەگىزگى ماقساتى - تۇركى ەلدەرى اراسىنداعى مادەني-رۋحاني بايلانىستاردى دامىتۋ.
بۇگىندە كەڭەستىڭ قۇرامىنا قازاقستان، قىرعىزستان، تۇركيا مەن ازەربايجان كىرەدى. ۇيىمنىڭ جانىندا سىرتقى ىستەر مينيسترلەرىنىڭ كەڭەسى جانە اقساقالدار كەڭەسى جۇمىس جاسايدى. ولار تۇركى كەڭەسىنىڭ جۇمىسىن ۇيىمداستىرىپ، رەتتەپ وتىرادى. كەڭەسكە قاراستى ءتورت نەگىزگى ۇيىم بار. ولار - تۇركى مادەنيەتى مەن ونەرىن دامىتۋ (TÚRKSOY) حالىقارالىق ۇيىمى، تۇركى تىلدەس ەلدەردىڭ پارلامەنتتىك اسسامبلەياسى (TÚRKPA)، تۇركى اكادەمياسى حالىقارالىق ۇيىمى (TWESCO) جانە «ميراس» تۇركى مادەنيەتىنىڭ قورى. بۇدان بولەك، تۇركى كەڭەسىنىڭ اياسىندا ىسكەرلىك كەڭەس جۇمىس ىستەيدى. ونىڭ نەگىزگى ماقساتى - شاعىن جانە ورتا بيزنەس سالالارىنداعى ىنتىماقتاستىقتى نىعايتۋ، جالپى ينۆەستيتسيالىق كليماتتى جاقسارتۋ.
بيىلعى سامميت قارساڭىندا III دۇنيەجۇزىلىك كوشپەندىلەر ويىندارى رەسمي تۇردە اشىلدى. سالتاناتتى شاراعا ق ر پرەزيدەنتى نۇرسۇلتان نازاربايەۆ تا قاتىستى.
