مەملەكەت باسشىسى كوشپەندىلەر ويىندارىنىڭ اشىلۋىنا قاتىستى
سالتاناتتى شارا شولپان-اتا قالاسىنىڭ يپپودرومىندا ءوتىپ جاتىر. وعان ق ر پرەزيدەنتى نۇرسۇلتان نازاربايەۆ قۇرمەتتى قوناق رەتىندە قاتىسۋدا، دەپ حابارلايدى قازاقپارات ءتىلشىسى.
دۇنيەجۇزىلىك كوشپەندىلەر ويىندارى - ەكى جىلدا ءبىر رەت وتەتىن شارا. بۇعان دەيىن اتالعان سپورت دوداسى ەكى رەت قىرعىزستاندا ۇيىمداستىرىلدى. سول كەزدە ونى تەك قىرعىز جەرىندە عانا وتكىزۋ تۋرالى شەشىم بولعان. الايدا وسى جولى قىرعىزستاننىڭ بيلىگى ەرەجەنى وزگەرتىپ، كوشپەندىلەر ويىندارىن ەستافەتامەن وتكىزۋدى ۇيعاردى. كەلەسى ويىندار 2020 -جىلى تۇركيادا وتەتىن بولدى.
بيىلعى دوداعا قازاقستان ءوز قۇراماسىن كۇشەيتىپ، بۇرىنعىدان ءۇش ەسە ارتىق سپورتشىلاردى اكەلىپ وتىر. جالپى، كوشپەندىلەر وليمپياداسىنا الەمنىڭ 60-تان استام ەلىنەن 2 مىڭعا جۋىق سپورتشى قاتىسادى. ولاردىڭ ىشىندە اۋعانستان، بولگاريا، بەلارۋس، ءۇندىستان، يران، موڭعوليا، قىتاي، پاكىستان، پولشا، تاجىكستان، تۇرىكمەنستان، وزبەكستان، ا ق ش، ۋكراينا، فرانتسيا، شري-لانكا جانە تاعى باسقا ەلدەردىڭ سپورتشىلارى بار. بارلىعى 37 ۇلتتىق سپورت ءتۇرى - كۇرەس، ساداق اتۋ، يتپەن اڭ اۋلاۋ، ات جارىس، كوكپار، اسىق اتۋ جانە تاعى باسقا جارىستار بويىنشا سىنعا تۇسەدى. سايىستار شولپان-اتانىڭ يپپودرومىندا جانە قىرشىڭ شاتقالىندا وتەدى.
بۇعان دەيىن قازاقپارات ءتىلشىسى قىرشىڭ شاتقالىنا بارىپ، سول جەردەگى دايىندىق شارالارىن كورىپ قايتتى. بۇدان بولەك، قازاقستاندىق سپورتشىلار جاتقان شيپاجايدا بولىپ، ولاردىڭ تۇرمىس جاعدايىمەن تانىستى.
بۇگىن رەسمي اشىلۋ سالتاناتىنا دەيىن تاجىك كۇرەسىنەن سايىستار ءوتتى. قازاقستاننىڭ پالۋانى مۇراتحان بەرىكبول 68 كەلى سالماقتا قولا مەدالدى جەڭىپ الدى. اسا اۋىر سالماقتا ماقسات جاندىلدايەۆ تا قولا جۇلدەگەر اتاندى. جالپى، ساراپقا 594 مەدال (174 التىن، 173 كۇمىس جانە 247 قولا) سالىنادى. ال III دۇنيەجۇزىلىك كوشپەندىلەر ويىندارىنىڭ سىياقى قورى 26 ميلليون سومدى قۇراپ وتىر. بۇل قازىرگى كۋرسپەن 136,5 ميلليون تەڭگە نەمەسە 381,3 مىڭ دوللاردى قۇرايدى.
ايتا كەتەيىك، بيىلعى ويىندار تۇركى ەلدەرى ىنتىماقتاستىق كەڭەسىنىڭ VI ءسامميتى قارساڭىندا ۇيىمداستىرىلىپ وتىر. ەرتەڭ، كەڭەستىڭ رەسمي وتىرىسى وتەدى. وعان قازاقستان، قىرعىزستان، تۇركيا مەن ازەربايجاننىڭ پرەزيدەنتتەرى قاتىسادى. وزبەكستان باسشىسى دا كەلەدى دەگەن جوسپار بار. ءسامميتتىڭ تاقىرىبى - «جاستار ساياساتى جانە ۇلتتىق سپورت تۇرلەرى سالاسىنداعى ىنتىماقتاستىق». وتىرىستا قازاقستان تۇركى كەڭەسىنىڭ ءتوراعالىعىن قىرعىزستانعا تاپسىرادى. ال حاتشىلىقتىڭ باسشىلىعىنا قازاقستاننىڭ وكىلى تاعايىندالادى. بۇدان بولەك، ءبىرقاتار قۇجاتتارعا قول قويىلادى دەگەن جوسپار بار.
