نۇرسۇلتان نازاربايەۆ بارشا اتا-انالار مەن وقۋشىلاردى ءبىلىم كۇنىمەن قۇتتىقتادى
«بۇگىن ءبىلىم كۇنىن اتاپ ءوتىپ جاتقانىمىزدى بىلەسىزدەر. مىناۋ قازىر استاناداعى ۇلكەن 1200 ورىندىق مەكتەپتىڭ اشىلۋىنا كەلىپ وتىرمىز. مەنىڭ سۇراۋىم بويىنشا كاتار ەميرى ەلىنەن ال تاني مىرزانىڭ بەرگەن بىزگە سىيلىعى. استاناعا قانشا سالساق تا مەكتەپ جەتپەيدى. بۇگىن قازاقستاننىڭ 7 مىڭ مەكتەبىندە 3 ميلليوننان استام بالا مەكتەپكە كەلدى. ونىڭ ىشىندە العاش رەت مەكتەپ تابالدىرىعىن اتتاپ وتىرعان بۇلدىرشىندەردىڭ سانى 350 مىڭ، تەك قانا استانانىڭ وزىندە - 18 مىڭ. 23 مەكتەپ ىسكە قوسىلدى. سالىنىپ جاتقان مەكتەپتەردىڭ سانى 180-نەن استى. بالالاردىڭ، بۇلدىرشىندەردىڭ كوبەيىپ، مەكتەپتىڭ جەتىسپەي جاتقانى ءبىر جاعىنان جاقسى. ەكىنشى جاعىنان ول شەشىلۋى ءتيىس نارسە»، - دەدى مەملەكەت باسشىسى.
قازاقستان پرەزيدەنتى ەلىمىز ءبىلىم سالاسىنا بارىنشا كوڭىل ءبولىپ جاتقانىن تىلگە تيەك ەتتى.
«ەلدىڭ بولاشاعى بىلىمدە، عىلىمدا، جاڭا تەحنولوگيادا. مەكتەپتەن باستاپ وقىتۋدى قازىرگى جاعدايعا بەيىمدەپ وقىتۋ قاجەت. ول ءۇشىن ءتيىستى مۇعالىمدەر كەرەك. مۇعالىمدەردىڭ موينىنا ارتىلاتىن مىندەت جىلدان جىلعا ءوسىپ كەلەدى. سول ءۇشىن ءبىز مۇعالىمدەردى دە قولداپ، قازىردەن باستاپ، جاڭا ءبىلىم سالاسىن مەڭگەرگەن، وزدەرىن كورسەتكەن ۇستازداردىڭ جالاقىسى 30-دان 50 پروتسەنتكە دەيىن كوبەيتەتىن بولامىز. وسىلاي مەكتەپتەردىڭ، بالالاردىڭ، مۇعالىمدەردىڭ جاعدايىن قاراپ، جالپى ءبىلىم بەرۋ ماسەلەسىن كوتەرۋگە جۇمىس ىستەپ جاتىرمىز. مەن بۇگىنگى ءبىلىم كۇنىمەن بارلىق بالالاردى جانە اتا-انالاردى قۇتتىقتايمىن»، - دەدى ەلباسى.
ەسكە سالا كەتسەك، قازاقستان پرەزيدەنتى نۇرسۇلتان نازاربايەۆ ەلورداداعى №85 -مەكتەپ- ليتسەيدىڭ اشىلۋ سالتاناتىنا قاتىسقان بولاتىن.
