ەلىمىزدىڭ بارلىق ايماعىندا تەحنيكالىق ءبىلىم بەرەتىن ليتسەيلەر اشۋ كوزدەلىپ وتىر
باسپاءسوز وكىلدەرىمەن وتكەن كەزدەسۋ بارىسىندا ءبىلىم جانە عىلىم ءمينيسترى ەرلان ساعاديەۆ وسىلاي دەدى. «الداعى وقۋ جىلىنىڭ باستى مىندەتى - ءوزىمىزدىڭ جۇمىستارىمىزدى ءارى قاراي ۇلكەن جاۋاپكەرشىلىكپەن جالعاستىرۋ، ءبىلىم ۇيىمدارىنىڭ جاۋاپكەرشىلىگىن كوتەرۋ». باسپاءسوز وكىلدەرىمەن وتكەن كەزدەسۋدى ەلىمىزدىڭ باس ۇستازى ەرلان ساعاديەۆ وسىلاي دەپ باستادى. ماقسات ايقىن، ەندى ىسكە كىرىسۋ كەرەك. بىرەر كۇننەن سوڭ رەسپۋبليكا بويىنشا 3 ميلليوننان استام وقۋشى مەكتەپكە جول تارتادى. ونىڭ ىشىندە 350 مىڭ ءبۇلدىرشىن ءۇشىن العاشقى قوڭىراۋ ءۇنى سىڭعىرلايدى. وسى رەتتە 110 مەكتەپتىڭ قۇرىلىسى جۇرگىزىلىپ جاتىر. وعان مەملەكەتتىك بيۋدجەتتەن 53 ميلليارد تەڭگە بولىنگەن. الايدا بۇل جايت بىرنەشە اۋىسىممەن وقۋ ماسەلەسىن تۇبەگەيلى شەشپەيدى.
1 - قىركۇيەكتەن باستاپ جان باسىنا قارجىلاندىرۋ مەحانيزمى ەلورداداعى 79 مەملەكەتتىك جانە 8 جەكەمەنشىك مەكتەپتە ەنگىزىلەدى. ال 2020 -جىلى بۇل جۇيە بارلىق قالا مەكتەپتەرىندە ىسكە اسادى. سونداي- اق جيىن بارىسىندا وزەكتى ماسەلەلەردىڭ ءبىرى - وقۋ ورىندارىن كىتاپتارمەن قامتاماسىز ەتۋ جايى دا قوزعالدى. بۇگىندە ءبىلىم وشاقتارىنا وقۋلىقتاردى جەتكىزۋ 99,4 پايىزدى قۇرايدى. مۇعالىمدەردىڭ مارتەبەسىن كوتەرۋ جانە بىلىكتىلىك تالاپتارىن كۇشەيتۋ جايى مينيسترلىك نازارىندا. سوڭعى دەرەكتەر بويىنشا 205 مىڭ ۇستازدىڭ جالاقىسى 30 پايىزعا ارتقان. سونداي- اق ماماندار ءۇي ارالاپ، بالا ءتىزىمىن جازۋ مىندەتىنەن بوساتىلدى. تولتىراتىن قاعازدار قاتارى دا بەسەۋگە دەيىن ازايدى. اتتەستاتتاۋدىڭ جاڭا جۇيەسى ەنگىزىلىپ، ديرەكتورلاردى تاعايىنداۋدىڭ قاعيدالارى دا وزگەردى.
بۇدان بولەك، پەداگوگ پەن اتا- انا قۇقىعىن قورعايتىن كەلىسىمشارت بەكىتىلدى. بۇدان بولەك، ەلىمىزدىڭ كوللەدجدەرىندە وقىتىلاتىن 109 جانە جوعارى وقۋ ورىندارىنداعى 17 ماماندىقتىڭ ليسەنزياسى كەرى قايتارىلدى. ەندى ولاردىڭ ورنىنا سۇرانىسقا يە باعىتتاردى دامىتۋ كوزدەلگەن. سوڭعى جىلدارى تەگىن كاسىپتىك- تەحنيكالىق ءبىلىم بەرۋ باعدارلاماسى بويىنشا وقيتىن ستۋدەنتتەر سانى 54 پايىزعا ارتقان. وسىعان وراي، بۇل باعىتتا قىزمەت ەتەتىن ۇستازداردىڭ بەدەلىن ارتتىرۋ ءۇشىن 2020 -جىلدان باستاپ ۇلتتىق بىلىكتىلىك تەستىلەۋىن ەنگىزۋ جوسپاردا بار.
