بۇگىن - قازاقستان رەسپۋبليكاسىنىڭ كونستيتۋتسياسى كۇنى
وسىدان 23 جىل بۇرىن قابىلدانعان كونستيتۋتسيا - مەملەكەت قۇرىلىمىنىڭ ەڭ ماڭىزدى قۇجاتى بولىپ تابىلادى. 1995 -جىلى 30 - تامىزدا ەلدىڭ جاڭا كونستيتۋتسياسىن قابىلداۋ جونىندە بۇكىل حالىقتىق رەفەرەندۋم ءوتىپ، وعان سايلاۋشىلاردىڭ 90,58 پايىزى قاتىسقان ەدى. ولاردىڭ 89,14 پايىزى جاڭا كونستيتۋتسيانىڭ قابىلدانۋىن قولدادى. كونستيتۋتسيا بۇكىل قازاقستان جۇرتشىلىعىنىڭ وي- پىكىرىن ەسەپكە الا وتىرىپ جاسالعان قۇقىقتىق- ساياسي قۇجات بولدى. سەبەبى، كونستيتۋتسيانى قالىپتاستىرۋعا قازاقستاندىق قالىڭ جۇرتشىلىق تىكەلەي قاتىسا وتىرىپ، رەسپۋبليكالىق رەفەرەندۋمدا قابىلداندى. بۇل ۇدەرىس اتا زاڭعا ەرەكشە ۇستەم كۇش بەرىپ، ونىڭ الەۋەتىن ارتتىردى.
1995 -جىلعى كونستيتۋتسيانىڭ ودان ەكى جىل بۇرىنعى، ياعني 1993 -جىلعى كونستيتۋتسيادان ايىرماشىلىعى - مازمۇنىنىڭ ساپاسىندا ەدى. جاڭا كونستيتۋتسياعا العاش رەت ازاماتتىڭ قۇقىعىنا قاتىستى عانا ەمەس، ادام دۇنيەگە كەلگەن ساتتەن ودان اجىراماس قۇقىقتارىنا دا قاتىستى نورمالار ەندى. ول بويىنشا پرەزيدەنت ساياسي جۇيەنىڭ باستى تۇلعاسى بولىپ، بيلىك تارماقتارىنان جوعارى تۇرادى. بۇل پرەزيدەنتتىك باسقارۋ جۇيەسىندەگى مەملەكەتكە ساي كەلەدى. قولدانىستاعى كونستيتۋتسيا رەسپۋبليكا ومىرىندە ەكونوميكالىق قانا ەمەس، ساياسي وزگەرىستەرگە دە جول اشتى. بۇل كونستيتۋتسيا مەملەكەتتىك بيلىكتىڭ ءبىرتۇتاستىعىن بەكىتە وتىرىپ، جۇمىلعان جۇدىرىقتاي جۇيەگە اينالدىردى. مەملەكەتتىك بيلىك ورگاندارىنىڭ حالىق الدىنداعى جاۋاپكەرشىلىگىن كۇشەيتتى. حالىق پەن مەملەكەتتىڭ اراسىنداعى كوممۋنيكاتيۆتىك كۇشكە اينالدى.
كونستيتۋتسيا قاعيداتتارىنا سايكەس، ەلىمىزدىڭ دەموكراتيالىق جولمەن دامۋ باعىتى ايقىندالدى. قۇقىقتىق مەملەكەت قالىپتاستىرۋ قاعيدالارى قوعامدا جانە ازاماتتاردىڭ ساناسىندا تۇپكىلىكتى بەكىتىلىپ، ءوز جەمىسىن بەرۋدە. ەڭ باستىسى، قازاقستان مەملەكەتتىگىنىڭ نىعايۋىنا، ەلىمىزدىڭ دامۋىنا، حالقىمىزدىڭ ءوسىپ- وركەندەۋىنە نەگىز قالاپ بەرگەن كونستيتۋتسيا تاۋەلسىزدىگىمىزدى تۇعىرلى ەتۋگە دە الەۋەتتى ەكەنىن تانىتىپ وتىر.
كونستيتۋتسيا كۇنى مەملەكەتتىك مەرەكە رەتىندە دەمالىس كۇنى بولىپ جاريالانعان.
اۆتور: ايان بەكەن ۇلى
