مۇعالىمدەر جىل سوڭىنا دەيىن اتتەستاتسيادان قايتا وتەدى
«2018 -جىلدىڭ جەلتوقسانىندا بىزدە قايتا ەمتيحان بولادى. مامىردا اتتەستاتسيادان وتە الماعان مۇعالىمدەر جەلتوقساندا قايتا وتەدى. بۇل تۇرعىدا ءبىز ەشقانداي شەكتەۋ قويمايمىز» ، - دەدى ول.
ەرلان ساعاديەۆتىڭ اتاپ وتۋىنشە، ءبىلىم جانە عىلىم مينيسترلىگى جاڭا وقۋ جىلىندا ءبىلىم بەرۋدىڭ بارلىق دەڭگەيلەرىندە جاۋاپكەرشىلىكتى ارتتىرۋدى باسىمدىق رەتىندە الدىنا قويىپ وتىر.
«بۇل - ەڭ ءبىرىنشى كەزەكتەگى مىندەت» ، - دەدى مينيستر.
جالپى ونىڭ دەرەگىنشە، مامىر ايىنداعى اتتەستاتتاۋعا 60 مىڭعا جۋىق ءمۇعالىم قاتىسىپ، ولاردىڭ ىشىنەن 36 مىڭنان استامى اتتەستاتسيادان ءوتتى. اتتەستاتسيادان وتكەندەر ۇلەسى 63 پايىزدى قۇرادى. وسى جىلدىڭ قىركۇيەك ايىنان باستاپ جاڭا اتتەستاتسيا تارتىبىنەن وتكەن مۇعالىمدەرگە كاتەگوريالارىنا سايكەس قوسىمشا اقى تولەنەدى.
سونىمەن بىرگە، اعىمداعى جىلى 110 مىڭنان استام پەداگوگ رەسپۋبليكالىق بيۋدجەت ەسەبىنەن بىلىكتىلىك ارتتىرۋ كۋرستارىنان ءوتىپ جاتىر. 8 مىڭنان استام ءپان ءمۇعالىمى جەكە پاندەردى اعىلشىن تىلىندە وقىتۋ ءۇشىن تىلدىك كۋرستاردا وقۋدا. ولاردىڭ 5 مىڭعا جۋىعى وسى وقۋ جىلىنان باستاپ ساباق بەرۋگە كىرىسەدى.
