استانا اكىمدىگى باس تارتقان قىزمەتتىك كولىكتەر كىمدەرگە بەرىلەدى

استانا. قازاقپارات - استانا اكىمدىگى باس تارتقان قىزمەتتىك كولىكتەر مەكتەپتەر، اۋرۋحانالار مەن پوليتسياعا بەرىلەدى.

 بۇل تۋرالى قالا اكىمدىگىندە وتكەن باسپا ءسوز ءماسليحاتىندا استانا قالالىق ورتانى رەگەنەراتسيالاۋ باسقارماسىنىڭ باسشىسى عاني يسقاليەۆ ءمالىم ەتتى، دەپ حابارلايدى قازاقپارات ءتىلشىسى.

 «ءبىز قىركۇيەك ايىنان باستاپ كولىك قىزمەتى تاكسوپاركتەرگە بەرەتىن بولدىق. تاكسوپاركتەردىڭ كونسورتسيۋم قۇرايتىن ءۇش كومپانياسى بىزگە ءوز ۇسىنىسىن بەرگەن. زاڭناماعا سايكەس، بارلىق راسىمدەردەن ءوتىپ، ءبىز وسى كونسورتسيۋمدى جەكە سەرىكتەس رەتىندە تاعايىندادىق. جالپى، مەملەكەتتىك جەكەشەلىك ارىپتەستىك جوباسى بويىنشا 5 جىلعا ەسەپتەلگەن. وسى 5 جىلدىڭ ىشىندە ءبىزدىڭ مەملەكەتتىك مىندەتتەمەلەردىڭ جالپى سوماسى 2 ميلليارد 71 ميلليون تەڭگە قۇرايتىن بولادى. ياعني، قازىرگى بىزدەگى اعىمدى شىعىنداردىڭ سوماسىن جوق دەگەندە 20 پايىزعا ازايتامىز. ناقتى سومالار بويىنشا ءبىزدىڭ بيۋدجەتتىك ۇنەم ودان دا جوعارى بولادى دەگەن ويدامىز»، - دەيدى.

ونىڭ ايتۋىنشا، وسى جوبانىڭ باسقا دا جاقسى جاقتارى بار.

«مىسالى، 5 جىلدىڭ ىشىندە قالا اكىمدىگى جاڭا اۆتوكولىكتەردى ساتىپ المايتىن بولادى. قازىر قولىمىزدا بار، اكىمدىكتىڭ بالانسىنداعى الپىسقا جۋىق اۆتوكولىكتى ءبىز پوليتسيا قىزمەتكەرلەرىنە، مەكتەپتەرگە، اۋرۋحانالارعا بەرەمىز. سوندىقتان وسى رەتتە دە ءبىرشاما بيۋدجەت قاراجاتىن ۇنەمدەۋگە قول جەتكىزەمىز. بۇدان باسقا قالا ورتالىعىندا ورنالاسقان «اۆتوشارۋاشىلىق استانا» كومپانياسىنىڭ تەحنيكالىق بازاسى ءبىزدىڭ قولىمىزدا قالىپ وتىر. سول بازانى مەملەكەت باسقا ماقساتتا پايدالاناتىن بولادى. ءبارىمىز تاكسي قىزمەتىن پايدالانامىز»، - دەدى ول.

ەسكە سالا كەتسەك، بۇعان دەيىن استانالىق اكىمدىكتىڭ 2018 -جىلدان باستاپ، تاكسي قولدانۋ بويىنشا پيلوتتىق جوباعا اۋىساتىنى حابارلانعان ەدى.

اۆتور: ايان بەكەن ۇلى