ەلىمىزدەگى اۋەجايلار قۇستارمەن قالاي كۇرەسەدى؟

الماتى. قازاقپارات - الماتى حالىقارالىق اۋەجاي باسقارماسى ۇشۋ ايماعىنداعى ورنيتولوگيالىق احۋال تۋرالى ايتىپ بەردى، دەپ حابارلايدى قازاقپارات ءتىلشىسى.

«ۇشۋ كەزىندە ورنيتولوگيالىق ماسەلەلەرگە تاپ بولامىز. الماتى اۋەجايىنىڭ ماڭىنداعى ەگىستىكتەر ماسەلەنى ودان ءارى ۋشىقتىرىپ وتىر. ءداندى داقىل ەگىستىگىنە ۇساق جاندىكتەر مەن قۇستار كوپ جينالاتىندىعى بەلگىلى. ءبىز بۇل ماسەلەمەن كۇرەستە حالىقارالىق تاجىريبەلەردى قولدانۋدامىز. ءبىراق بار جۇمىس مۇنىمەن بىتپەيدى. اۋە كەمەسى قۇستارمەن ءجيى سوقتىعىسادى. جاقىندا عانا «ەير استانا» اۋە كومپانياسى بۇل ماسەلەگە ۇسىنىسىن بىلدىرگەن ەدى. ءبىز وبلىستىق، اۋداندىق اكىمدىكتەرمەن بىرلەسىپ اەرودروم اۋماعىنا قۇستار جينالمايتىنداي ەتىپ، الاڭدى باسقا مادەنيەتپەن تولتىرۋدى قولعا الامىز»، - دەدى الماتى اۋەجايىنىڭ ءبىرىنشى ۆيتسە-پرەزيدەنتى الەكساندر گوردەيەۆ.

بۇگىندە اۋەجايدا ورنيتولوگيالىق قىزمەت كۇشەيگەن. الايدا قۇستاردىڭ قولدانىلىپ جاتقان امال شارالاردان ءبىر جولا ۇركيتىن ءتۇرى جوق.

«ءبىز ارنايى قۇستار توبىنا نىساناعا الاتىن لازەرلى قارۋدى پايدالاندىق. ناتيجەسىندە قۇستاردىڭ ۇشاققا سوعىلۋى سيرەپ كەلەدى. نەگىزگى تاسىمالداۋشى «ەير استانا» جالپى جۇك كولەمىنىڭ 60 پايىزىن تاسىمالدايدى. ستاتيستيكاعا سۇيەنسەك جىلىنا قۇستارمەن 8-10 رەت سوعىسۋ فاكتىسى تىركەلەدى ەكەن. ونىڭ ىشىندە اۋە كەمەسىنە زياني كەلتىرەتىن جاعدايلار بار»، - دەدى ۆيتسە-پرەزيدەنت.

اۋەجاي قۇستارمەن 5 جىلدىق كۇرەستىڭ ارقاسىندا ۇشاق كەلىپ قوناتىن كليۋچي اۋدانىنداعى قوقىس ۇيىندىسىنەن ارىلعان. بۇرىنعى قوقىس الاڭىنىڭ توپىراعى قايتا قالپىنا كەلتىرىلىپ، اەرودروم اۋماعىندا قۇستار ازايعان.