قازاقستاندا ءار بەسىنشى ەرلى-زايىپتى تابيعي جولمەن بالا سۇيە المايدى

استانا. قازاقپارات - قازاقستاندا ءار بەس-التى وتباسىنىڭ بىرىندە تابيعي جولمەن بالا كوتەرە المايدى. بۇل تۋرالى قازاقپارات تىلشىسىنە بەرگەن سۇحباتىندا ەلىمىزدەگى العاشقى ە ك ۇ زەرتحاناسىنىڭ نەگىزىن قالاۋشى، بيولوگيا عىلىمدارىنىڭ دوكتورى سالتانات بايقوشقاروۆا ايتىپ بەردى.

«جالپى، بەس-التى وتباسىنىڭ بىرىندە بەلسىزدىك پروبلەماسى بار، قازاقستان دا بۇدان سىرت قالعان جوق. بىرەۋلەر تۇڭعىش بالاسىن كوتەرە المايدى، كەيبىرەۋلەر ەكىنشى بالاعا، ەندى بىرەۋلەر ءۇشىنشى رەت جۇكتى بولا المايدى»، - دەيدى سالتانات بايقوشقاروۆا.

دوكتور قازاقستاندا رەپرودۋكتولوگيا جوعارى دەڭگەيدە دامىعانىن ايتادى.

«ەگەر وزىمدە وسى پروبلەما بولسا، جاساندى جولمەن بالا كوتەرۋ (ەكستروكورپورالدى ۇرىقتاندىرۋ - ە ك ۇ ءادىسى) ءۇشىن شەتەلگە بارماس ەدىم. ويتكەنى ءبىزدىڭ ەلدە دە مۇنداي قىزمەتتى جوعارى دەڭگەيدە كورسەتەتىن زەرتحانالار بار. قازاقستاندا ە ك ۇ ءادىسىن العاش رەت 1995-جىلى ەنگىزدىم، سودان تۇڭعىش بالا 1996-جىلى دۇنيەگە كەلدى. ياعني 23 جىلدان بەرى ە ك ۇ سالاسىندا، ال جالپى رەپرودۋكتولوگيا سالاسىندا 30 جىلدان بەرى جۇمىس ىستەپ كەلەمىن. رەپرودۋكتولوگيا ءبىزدىڭ ەلدە جوعارى دەڭگەيدە»، - دەيدى س. بايقوشقاروۆا.

سونىمەن قاتار قازىردە تۇرلىشە ورتالىقتار، ءار ءتۇرلى زەرتحانالار بار ەكەنىن ايتادى.

«رەسمي تۇردە 20 عا جۋىق ورتالىق جانە زەرتحانا تىركەلگەن بولسا، سونىڭ شامامەن جارتىسى ءونىمدى قىزمەت اتقارىپ كەلەدى. ورتالىقتاردىڭ ءبارى دە مىقتى دەپ ايتا المايمىن، ءبىراق جالپى، ءبىزدىڭ ەل تۇرعىنداردىڭ جاساندى ۇرىقتاندىرۋعا دەگەن قاجەتتىلىگىن تولىق قامتاماسىز ەتە الادى. ءبىزدىڭ ماماندارعا ءتىپتى شەتەلدىكتەر دە جۇگىنەدى»، - دەيدى ول.