نۇرسۇلتان نازاربايەۆ ورتالىق ازيانىڭ حالىقارالىق سۋ- ەنەرگەتيكالىق كونسورتسيۋمىن قۇرۋدى ۇسىندى

تۇرىكمەنباشى. قازاقپارات - بۇگىن حالىقارالىق ارالدى قۇتقارۋ قورىنىڭ قۇرىلتايشى مەملەكەتتەرى باسشىلارىنىڭ ءسامميتىنىڭ كەڭەيتىلگەن قۇرامداعى وتىرىسىندا ەلباسى نۇرسۇلتان نازاربايەۆ ورتالىق ازيانىڭ حالىقارالىق سۋ- ەنەرگەتيكالىق كونسورتسيۋمىن قۇرۋدى ۇسىندى، دەپ حابارلايدى قازاقپارات ءتىلشىسى.

«بىرىنشىدەن، حالىقارالىق ارالدى قۇتقارۋ قورىنىڭ قولدانىستاعى ينستيتۋتتارى نەگىزىندە قوردىڭ ۇيىمدىق قۇرىلىمدارى مەن شارتتىق- قۇقىقتىق بازاسىن جەتىلدىرۋ قاجەت. بۇل ح ا ق ق جۇمىسىنىڭ ساپاسىن ارتتىرۋعا، ونىڭ الەۋەتىن نىعايتىپ، ۇيىمنىڭ زاماناۋي تەگەۋىرىندەرگە بەيىمدەلۋىنە مۇمكىندىك بەرەدى. ەكىنشىدەن، ارال تەڭىزى باسسەينى سۋ رەسۋرستارىن باسقارۋ، ءبولۋ، ەسەپكە الۋ جانە مونيتورينگىلەۋ جۇيەلەرىن اۆتوماتتاندىراتىن ۋاقىت جەتتى. بۇل ەلدەردىڭ سۋدى پايدالانۋ اشىقتىعىن قامتاماسىز ەتىپ، ءوزارا سەنىمدى نىعايتادى»، - دەدى قازاقستان پرەزيدەنتى.

ۇشىنشىدەن، مەملەكەت باسشىسى ارال تەڭىزى باسسەينى ەلدەرىنە كومەك كورسەتۋ جونىندەگى ءىس- قيمىل باعدارلاماسى اياسىندا وڭىرلىك جوبالاردى جۇزەگە اسىرۋعا باسىمدىق بەرۋ قاجەتتىگىن ايتتى. مۇنداي ءادىس ورتالىق ازيا ەلدەرى قابىلدايتىن شارالاردىڭ ناتيجەلىلىگىن ايتارلىقتاي ارتتىرىپ، ىنتىماقتاستىققا تيىمدىلىك بەرەتىن بولادى.

«تورتىنشىدەن، قازىرگى جاعدايدا ورتالىق ازيانىڭ حالىقارالىق سۋ- ەنەرگەتيكالىق كونسورتسيۋمىن قۇرۋ ماسەلەسىنە ورالۋ ماڭىزدى. ونى قۇرۋ ترانسشەكارالىق وزەندەردىڭ سۋ رەسۋرستارىن پايدالانۋ بارىسىندا يرريگاتسيا مەن گيدروەنەرگەتيكا اراسىنداعى تەڭگەرىمدى قامتاماسىز ەتۋگە مۇمكىندىك بەرەدى. بەسىنشىدەن، ح ا ق ق اتقارۋ كوميتەتىن ءبىزدىڭ ەلدەرىمىزدىڭ بىرىندە تۇراقتى قونىستاندىرۋ ماسەلەسىن قاراستىرۋ قاجەت. بۇل قىزمەتىنىڭ تيىمدىلىگىنە وڭ اسەرىن تيگىزەدى، ءتوراعالىق ەتۋشى تاراپ اۋىسقان كەزدە ونى قونىس اۋدارۋى بارىسىندا جۇمىستاردىڭ تەجەلۋىنە جول بەرمەيدى»، - دەدى مەملەكەت باسشىسى.

فوتو: www.akorda.kz

اۆتور: مارلان جيەمباي