ورتا ازيا ەلدەرىنىڭ پرەزيدەنتتەرى ارال پروبلەماسىن تالقىلايدى
ساپار بارىسىندا ەلباسى مەملەكەتتەر باسشىلارىنىڭ شاعىن جانە كەڭەيتىلگەن قۇرامداعى وتىرىستارىنا قاتىسىپ، تۇرىكمەنستان پرەزيدەنتى گۋربانگۋلى بەردىمۇحامەدوۆپەن كەزدەسەدى دەپ جوسپارلانعان.
ايتا كەتەيىك، 1993-جىلدىڭ 4- قاڭتارىندا تاشكەنتتە ورتالىق ازيا مەملەكەتتەرىنىڭ باسشىلارى حالىقارالىق ارالدى قۇتقارۋ قورىن قۇرۋ تۋرالى بىرلەسكەن كومميۋنيكە قابىلداعان بولاتىن. سول جىلدىڭ 26- ناۋرىزىندا قىزىلوردادا ورتالىق ازيا مەملەكەتتەرىنىڭ باسشىلارى ارال تەڭىزى مەن ارال ماڭى پروبلەماسىن شەشۋ، ارال تەڭىزىن ساۋىقتىرۋ جانە الەۋمەتتىك- ەكونوميكالىق دامۋىن قامتاماسىز ەتۋ جونىندەگى بىرلەسكەن ءىس-قيمىل تۋرالى شەشىم قابىلداعان ەدى. مۇنان كەيىن دە مەملەكەت باسشىلارى بىرنەشە مارتە باس قوسىپ، تەڭىزدىڭ پروبلەمالىق ماسەلەلەرىن تالقىلادى. ال سوڭعى كەزدەسۋ وسىدان 9 جىل بۇرىن (2009) الماتى قالاسىندا ءوتتى.
ايتا كەتەرلىگى، ەلىمىز تاۋەلسىزدىك العان جىلدان باستاپ- اق ەلباسى نۇرسۇلتان نازاربايەۆ ارال پروبلەماسىنا الەمدىك قوعامداستىق نازارىن ءجيى اۋدارتىپ، بىرىككەن ۇلتتار ۇيىمىنىڭ بيىك مىنبەرىندە دە كوتەرگەن ەدى.
ماسەلەن، 2017-جىلى 27- قىركۇيەكتە ب ۇ ۇ- نىڭ 2015-جىلدان كەيىنگى دامۋ كەزەڭىنە ارنالعان كۇن ءتارتىبىن قابىلداۋ جونىندەگى سامميت بارىسىندا قازاقستان پرەزيدەنتى: «جويىلىپ بارا جاتقان ارال تەڭىزىنىڭ ماسەلەسى ءبىزدىڭ وڭىرگە عانا ەمەس، بۇكىل الەمگە قاتەر توندىرەدى. تەڭىزدىڭ تارتىلۋى سالدارىنان جىل سايىن 75 ميلليون تونناعا دەيىن شاڭ مەن ۋلى تۇزدى جەل كوتەرىپ، ونىڭ توزاڭى قازىردىڭ وزىندە ەۋروپا مەن انتاركتيدادان تابىلىپ وتىر. دۇنيەجۇزىلىك بانكتىڭ قولداۋىمەن ءبىز ارال تەڭىزىنىڭ سولتۇستىك بولىگىن قالپىنا كەلتىردىك. ءبىز ب ۇ ۇ- مەن جانە حالىقارالىق قوعامداستىقپەن بۇرىنعى سەمەي يادرولىق پوليگونى ايماعىن ساۋىقتىرۋ جونىندە بەلسەندى تۇردە ىنتىماقتاستىق ورناتىپ وتىرمىز. ورتالىق ازيا ەلدەرى بۇل ەكولوگيالىق پروبلەمالارمەن كۇرەسۋ ءۇشىن كومەك كۇتەدى»، - دەگەن بولاتىن.
