ەلباسى: «نازاربايەۆ ۋنيۆەرسيتەتىن» قازاقتىڭ ەليتاسىن تاربيەلەسىن دەپ جاسادىم
بۇل تۋرالى مەملەكەت باسشىسى نۇرسۇلتان نازاربايەۆ اتىراۋ وبلىسىنىڭ الەۋمەتتىك- ەكونوميكالىق دامۋ ماسەلەلەرى جونىندە كەڭەسىندە ايتتى، دەپ حابارلايدى قازاقپارات ءتىلشىسى.
«بۇل مەكتەپتەن قازىر باسقا ەلدەردەن دە كەلىپ ۇيرەنگىسى كەلەدى. ەش جەردە جوق. ت م د مەملەكەتتەرىندە، باسقا ەلدەردە دە جوق. وعان «ءبىزدىڭ بالالارىمىز تۇسە الماي قالدى، بايلاردىڭ، باستىقتاردىڭ بالالارى ءۇشىن جاسالعان ەكەن» دەگەن اڭگىمە بار. ءبىراق، بۇل مەكتەپتەرگە ءادىل بىلىممەن عانا تۇسەدى. ادامزاتتىڭ بالاسىنىڭ بارلىعى بىردەي بولمايدى. بەس ساۋساق بىردەي ەمەس. بىرەۋى يگەرەدى، بىرەۋى يگەرە المايدى. كىم بالاسىن جەك كورسىن، ءبىز بالالارىمىزدى تاربيەلەگەندە «سەن پرەزيدەنت بولاسىڭ، سەن سونداي بولاسىڭ» دەيمىز. ونىڭ بارلىعى دۇرىس. ءبىراق، سوعان ەرتەڭ جەتە الماسا باقىتسىزبىن دەپ سانايدى»، - دەپ اتاپ ءوتتى ەلباسى.
مەملەكەت باسشىسى سوندىقتان بالانى جاس كەزىنەن ەڭبەككە تاربيەلەۋ كەرەكتىگىن باسا ايتتى.
«زياتكەرلىك مەكتەپتى، «نازاربايەۆ» ۋنيۆەرسيتەتىن قازاقتىڭ ەليتاسىن تاربيەلەسىن دەپ جاسادىم. ەلدىڭ بارلىعىنىڭ قابىلەتى جەتپەيدى. اركىمنىڭ اقىل- ويى، ساناسى ءارتۇرلى بولادى. بىلاي ويلاپ قاراساڭىزدار، قازىر دۇنيەدەگى ادامداردىڭ 2-اق پايىزدان استامىنىڭ عانا جوعارى ءبىلىمى بار. سوندىقتان حالىق ءتۇسىنۋ كەرەك. ءبىراق قابىلداۋ ءادىل بولۋى كەرەك»، - دەدى نۇرسۇلتان نازاربايەۆ.
وسى رەتتە مەملەكەت باسشىسى مەكتەپكە قابىلداۋدا «بارماق باستى، كوز قىستى» ارەكەتتەر بولاتىن بولسا، قاتاڭ جازالاناتىندىعىن ەسكەرتتى.
سونداي- اق ەلباسى اتىراۋداعى «نازاربايەۆ» زياتكەرلىك مەكتەبى حيميا- بيولوگيا باعىتىندا ءبىلىم بەرەتىندىگىن ايتا كەلە: «قازىرگى كۇنى دۇنيەدەگى عىلىمنىڭ الدىندا تۇرعان ءبىرىنشىسى جاساندى ينتەلەكت، ەكىنشىسى بيوينجەنەريا، ءۇشىنشىسى نانوتەحنولوگيا، ءتورتىنشىسى اقپاراتتىق تەحنولوگيا. وسى ءتورت نارسەمەن دۇنيە جىلجىپ بارادى. ءبىز سونى باسقاراتىن ادامداردى دايىنداۋىمىز كەرەك»، - دەپ ەسكەرتتى.
اۆتور: مارلان جيەمباي
