ەلباسى اتىراۋدا جۇزەگە اسىرىلاتىن ينۆەستيتسيالىق جوبالارمەن تانىستى

اتىراۋ. قازاقپارات - مەملەكەت باسشىسى نۇرسۇلتان نازاربايەۆ اتىراۋ قالاسىنا جۇمىس ساپارى اياسىندا «كارات» جاۋاپكەرشىلىگى شەكتەۋلى سەرىكتەستىگى شىعاراتىن ونىمدەرمەن تانىستى.

سونىمەن قاتار ەلباسىنا «داۋلەت» يندۋستريالدى ايماعىندا جۇزەگە اسىرىلاتىن ينۆەستيتسيالىق جوبالار تانىستىرىلدى، دەپ حابارلايدى قازاقپارات ءتىلشىسى.

«داۋلەت» جەكەمەنشىك يندۋستريالدى ايماعىندا ورنالاسقان كاسىپورىن ماكارون، نان ونىمدەرىن ەت كونسەرۆىلەرىن، اۋىز سۋ، ارنايى كيىم-كەشەك شىعارۋمەن قاتار ۇن تارتاتىن ءوندىرىسىن دە ىسكە قوسقان. مۇنان بولەك، اسفالت بەتون زاۋىتى دا بار. جالپى بەس ءوندىرىس وشاعىنىڭ جالپى قۇنى 1,5 ميلليارد تەڭگەدەن اسىپ جىعىلادى. ءوندىرىس ورىندارى 191 ادامدى جۇمىس ورنىمەن قامتاماسىز وتىر.

ايتا كەتەرلىگى، سەرىكتەستىكتىڭ مۇنان بولەك اسحانا، جاتاقحانا، قويما، تەمىر جول تۇيىعى، جەمىس-جيدەك ساقتاۋ قويماسى سىندى قوسىمشا ينفراقۇرىلىمدارى بار.

ال قازاقستان پرەزيدەنتىنە تانىستىرىلعان ينۆەستيتسيالىق جوبالاردىڭ قاتارىندا قۇنى 12 ميلليارد تەڭگە بولاتىن جەل ەلەكتر ستانساسى بار. جىلدىق قۋاتى 52 م ۆ ت ەلەكتر ەنەرگياسىن قۇرايتىن جوبا 2019-جىلى جۇزەگە اسىرىلادى. بيىل پايدالانۋعا بەرىلەتىن ىستىق مىرىشتاۋ سەحىنىڭ قۇنى 2,6 ميلليارد تەڭگەنى قۇرايدى. ءوندىرىس ورنى شىعاراتىن 8230 توننا توزۋعا قارسى قورعايتىن جابىندىلار وتاندىق نارىققا شىعارىلادى.

اتالعان ايماقتا 2019-جىلى پايدالانۋعا بەرىلەتىن فارماتسيەۆتيكالىق زاۋىتتىڭ قۇنى 7,4 ميلليارد تەڭگە. زاۋىت 400 ادامدى جۇمىسپەن قامتاماسىز ەتەتىن بولادى. وندا 1200 ميلليون دانا ءدارى، 300 ميلليون دانا كاپسۋلا، 54 ميلليون دانا امپۋلا، 12 ميلليون بۋما ماي، 16 ميلليون قۇتى سۇيىقتىق شىعارىلادى. شىعارىلعان ونىمدەردىڭ ەلۋ پايىزى ىشكى نارىقتا ساتىلسا، قالعان 50 پايىزى ت م د ەلدەرىنە جونەلتىلەتىن بولادى.

اۆتور: مارلان جيەمباي