قارجى ءمينيسترى سالىق تۇسىمدەرىنىڭ ارتىعىمەن ورىندالۋىن ءتۇسىندىردى

استانا. قازاقپارات - بۇگىن ۇكىمەت وتىرىسىندا ق ر قارجى ءمينيسترى باقىت سۇلتانوۆ بيىلعى جەتى ايداعى سالىقتىق تۇسىمدەر تۋرالى مالىمەتتەردى جاريالادى، دەپ حابارلايدى قازاقپارات.

«اعىمداعى جىلعى جەتى ايدىڭ قورىتىندىسى بويىنشا مەملەكەتتىك بيۋدجەتتىڭ نەگىزگى كورسەتكىشتەرى وتكەن جىلدىڭ وسىعان ۇقساس كەزەڭىمەن سالىستىرعاندا، بيۋدجەتتىڭ اتقارىلۋىنىڭ جاقسارعانىن سيپاتتايدى.

تۇسىمدەر 6 تريلليون 264 ميلليارد تەڭگەنى، ياعني ەسەپتى كەزەڭگە ارنالعان جوسپارعا 101,9 پايىزدى قۇرادى. شىعىستار 6 تريلليون 466 ميلليارد تەڭگە سوماعا نەمەسە 98 پايىزعا جۇرگىزىلدى.

مەملەكەتتىك بيۋدجەت تاپشىلىعى 203 ميلليارد تەڭگە سوماسىندا قالىپتاستى. بۇل جوسپارلانعان سومادان ەكى ەسە از (454 ميلليارد تەڭگە) »، - دەدى ب. سۇلتانوۆ.

 ونىڭ سوزىنە قاراعاندا، مەملەكەتتىك بيۋدجەتكە 4 تريلليون 351 ميلليارد تەڭگە كىرىستەر (ترانسفەرتتەردى ەسەپكە الۋسىز) ءتۇستى نەمەسە جوسپار 104,4 پايىزعا ورىندالدى.

رەسپۋبليكالىق بيۋدجەت كىرىستەرى 104,2 پايىزعا ورىندالىپ، بيۋدجەتكە 3 053 ميلليارد تەڭگە ءتۇستى. وتكەن جىلدىڭ وسىنداي كەزەڭىمەن سالىستىرعاندا ءوسۋ قارقىنى 116,2 پايىزدى قۇرادى.

 «ءبىر جىل بۇرىنعى كەزەڭمەن سالىستىرعاندا بيۋدجەتكە سالىقتار 432 ميلليارد تەڭگەگە كوپ ءتۇستى. مۇنداي ءوسىم نەگىزىنەن قوسىلعان قۇن سالىعى - 207 ميلليارد تەڭگە، ەكسپورتتىق كەدەن باجى 107 ميلليارد تەڭگە ەسەبىنەن قامتاماسىز ەتىلدى. وسى جەردە اتاپ وتكىم كەلەدى، سالىقتىق جانە كەدەندىك تەكسەرۋلەردىڭ سانى 52,6 پايىزعا قىسقارتىلدى. سونىمەن قاتار، كورپوراتيۆتىك تابىس سالىعى بويىنشا تۇسىمدەردىڭ 2017 -جىلدىڭ وسىعان ۇقساس كەزەڭىمەن سالىستىرعاندا 34 ميلليارد تەڭگەگە (4 پايىز) وسۋىنە قاراماستان، 29,2 ميلليارد تەڭگە سوماعا جوسپاردىڭ ورىندالماۋى بايقالدى. نەگىزگى سەبەپ - بانك سەكتورىنان تۇسەتىن تۇسىمدەرىڭ ازايۋى»، - دەپ ناقتىلادى مينيستر.

باقىت سۇلتانوۆتىڭ ايتۋىنا قاراعاندا، سالىق تولەۋشىلەرگە جىبەرىلگەن حابارلامالاردىڭ سانى 2,8 ەسەگە ازايتىلدى. وسىمەن قاتار، ءوندىرىپ الۋدىڭ ۇلەستىك سالماعىنىڭ 17,3 پايىزعا ۇلعايۋىنا قول جەتكىزىلدى.

 «بۇل رەتتە، ەكونوميكانىڭ بارلىق سالالارىندا ماكروەكونوميكالىق كورسەتكىشتەردىڭ جاقسارعانىن ايتا كەتكىمىز كەلەدى. ناتيجەسىندە، سالىق تولەۋشىلەر وزدەرىنىڭ تابىستارىنىڭ كولەمىن ۇلعايتۋعا دەكلاراتسيالار ۇسىندى. ول بيۋدجەتكە قوسىمشا 37 ميلليارد تەڭگەنىڭ تۇسۋىنە سەبەپ بولدى سالىق تۇسىمدەرى كولەمىنىڭ ارتىعىمەن ورىندالۋى مەن وسۋىنە «سالىقتار جينالىمىنىڭ ارتۋى» جوباسىن جوسپارلى تۇردە جۇزەگە اسىرۋ دا ءوز اسەرىن تيگىزدى. بيۋدجەتكە جوبا ەسەبىنەن 56,5 ميلليارد تەڭگە (جوسپار 45 ميلليارد تەڭگە) ءتۇستى»، - دەدى ول.

اۆتور: رۋسلان عابباسوۆ