ەلباسى جاڭا قورعانىس ءمينيسترىنىڭ تاعايىندالۋىن ءتۇسىندىردى

استانا. قازاقپارات - مەملەكەت باسشىسى قازاقستان رەسپۋبليكاسى قورعانىس مينيسترلىگىنىڭ باسشىلىق قۇرامىمەن كەڭەس وتكىزدى، دەپ حابارلايدى اقوردانىڭ باسپا ءسوز قىزمەتى.

كەڭەس بارىسىندا نۇرسۇلتان نازاربايەۆ 25 جىل ىشىندە قازاقستان قارۋلى كۇشتەرى مەملەكەت پەن جەكە قۇرامنىڭ كۇش- جىگەرىنىڭ ارقاسىندا مىقتى اسكەري الەۋەتى بار ەل تاۋەلسىزدىگىنىڭ سەنىمدى تىرەگىنە اينالعانىن اتاپ ءوتتى.

«سوڭعى جىلدارى قارۋلى كۇشتەردى دامىتۋ ىسىندە كوپتەگەن جۇمىس اتقارىلدى. ءبىرقاتار ماڭىزدى ستراتەگيالىق قۇجاتتار قابىلداندى، سونىڭ ىشىندە ۇلتتىق قاۋىپسىزدىك ستراتەگياسى، قازاقستان رەسپۋبليكاسىنىڭ اسكەري دوكتريناسى، قارۋلى كۇشتەردى دامىتۋ تۇجىرىمداماسى جانە قورعانىس سالاسىنا قاتىستى نورماتيۆتىك قۇقىقتىق اكتىلەر بار»، - دەدى قازاقستان پرەزيدەنتى.

مەملەكەت باسشىسى گەوساياسي احۋالدىڭ وزگەرۋى جانە جاڭا سىن- قاتەرلەردىڭ پايدا بولۋى جاعدايىندا قورعانىس مينيسترلىگىنىڭ الدىندا تۇرعان نەگىزگى مىندەتتەردىڭ ءبىرى قارۋ- جاراقتاردى تەحنولوگيالىق تۇرعىدان جەتىلدىرۋ جانە جاڭعىرتۋ بولىپ سانالاتىنىن ايتتى.

«سوندىقتان، قورعانىس ءمينيسترى لاۋازىمىنا ازاماتتىق تۇلعانى، ياعني، قاۋىپسىزدىك جونىندەگى كومەكشىم - قاۋىپسىزدىك كەڭەسىنىڭ حاتشىسى ەرمەكبايەۆ نۇرلان بايۇزاق ۇلىن تاعايىنداۋعا شەشىم قابىلدادىم. سونىمەن بىرگە، ن. ەرمەكبايەۆ كادرلىق وفيسەر، اسكەري قىزمەتتە تاجىريبەسى بار، سونىڭ ىشىندە شيەلەنىس ايماقتارىندا بولعان. ول حالىقارالىق ماسەلەلەر جونىندەگى كومەكشى، قىتايدا جانە وڭتۇستىك شىعىس ازيانىڭ ءبىرقاتار ەلىندە ەلشى، مينيستر جانە ەكى رەت قاۋىپسىزدىك كەڭەسىنىڭ حاتشىسى قىزمەتتەرىن اتقاردى»، - دەدى نۇرسۇلتان نازاربايەۆ.

مەملەكەت باسشىسى زاماناۋي تالاپتاردى ەسكەرە وتىرىپ، اسكەري كادرلاردىڭ دايىندىعىن جەتىلدىرۋ قاجەتتىگىنە نازار اۋداردى.

«گەنەرال- پولكوۆنيك ساكەن ءادىلحان ۇلى جاسۇزاقوۆقا قالتقىسىز قىزمەت ەتكەنى ءۇشىن ريزاشىلىق بىلدىرەمىن جانە وعان ۇلتتىق قورعانىس ۋنيۆەرسيتەتىن باسقارۋدى تاپسىرامىن. ۋنيۆەرسيتەت الدىندا قارۋلى كۇشتەردىڭ باسقارۋ قۇرامىنىڭ بىلىكتىلىگىن ارتتىرۋ جانە اسكەري عىلىمدى دامىتۋ جونىندەگى ماڭىزدى مىندەتتەر تۇر. ۋنيۆەرسيتەت ەلىمىزدىڭ عانا ەمەس، سونداي- اق كورشىلەس ەلدەردىڭ دە كۋرسانتتارى وقيتىن نەگىزگى عىلىم، ءبىلىم ورتالىعىنا اينالۋى ءتيىس»، - دەدى قازاقستان پرەزيدەنتى.

سوڭىندا قازاقستان پرەزيدەنتى ەلىمىزدىڭ قارۋلى كۇشتەرىن ودان ءارى دامىتۋ جونىندە ءبىرقاتار ناقتى تاپسىرما بەردى.