ۇكىمەت باسشىسى جۇمىسسىز جاستاردى قىسقا مەرزىمدى بىلىممەن قامتۋدى تاپسىردى

استانا. قازاقپارات - ق ر پرەمەر-ءمينيسترى باقىتجان ساعىنتايەۆ كاسىپتىك- تەحنيكالىق بىلىمگە جاستاردى كوپتەپ تارتۋدى جۇكتەدى، دەپ حابارلايدى قازاقپارات ءتىلشىسى.

ۇكىمەت باسشىسىنىڭ ايتۋىنشا، بۇگىندە كاسىپتىك- تەحنيكالىق ءبىلىم تەگىن بولسا دا، جاستار ونداي وقۋعا كوپ بارا بەرمەيدى. «مەملەكەتتىك تاپسىرىس 75 مىڭنان 100 مىڭ ورىنعا (گرانتقا - اۆت.) دەيىن ۇلعايدى. الايدا 14-24 جاس ارالىعىنداعى جاستاردى تەحنيكالىق جانە بەيىندى بىلىممەن قامتۋ تومەن بولىپ وتىر.

قازىر اتالعان كورسەتكىش بار بولعانى 17 پروتسەنتتى قۇرايدى. ەڭ تومەنگى كورسەتكىش الماتى وبلىسىندا - 10 پروتسەنت، تۇركىستان وبلىسىندا - 13,9 پروتسەنت، سولتۇستىك قازاقستان وبلىسىندا - 14,4 پروتسەنت جانە جامبىل وبلىسىندا - 14,5 پروتسەنت. وسىعان بايلانىستى ءبىلىم جانە عىلىم مينيسترلىگى اكىمدىكتەرمەن، سونداي-اق، «اتامەكەن» ۇلتتىق كاسىپكەرلەر پالاتاسىمەن بىرلەسە وتىرىپ، جۇمىسسىز جۇرگەن جاستاردى كاسىپتىك بىلىممەن قىسقا مەرزىمدە، فورمالدى ەمەس جانە قوسىمشا بىلىممەن قامتۋ بويىنشا جۇيەلى شارالار قابىلداسىن»، - دەدى ب. ساعىنتايەۆ.

پرەمەر-ءمينيستردىڭ سوزىنە قاراعاندا، جوعارى وقۋ ورىندارى مەن كوللەدجدەردە بەرىلەتىن ءبىلىم بۇگىنگى زامان تالابىنا ساي بولۋى شارت. سەبەبى قازىرگى ءبىلىم بەرۋ باعدارلامالارى سيفرلاندىرۋ سياقتى ماڭىزدى جوسپارلارمەن ۇندەسپەي جاتادى.

ايتا كەتەيىك، وتىرىس بارىسىندا مينيستر ەرلان ساعاديەۆ جاڭارتىلعان مازمۇنداعى ءبىلىم بەرۋ ماسەلەسىنە دە توقتالدى. ونىڭ ايتۋىنشا، جوسپار بويىنشا بيىل ءبىرقاتار سىنىپتار ءبىلىمنىڭ جاڭارتىلعان مازمۇنىنا كوشەتىن بولادى.

«وتكەن جىلدان باستاپ 1-ءشى، 2-ءشى، 5-ءشى جانە 7-ءشى سىنىپتار جاڭا وقۋ باعدارلاماسى بويىنشا ءبىلىم الۋدا. وسى 2018-وقۋ جىلىنان باستاپ قوسىمشا 3-ءشى، 6-شى جانە 8-ءشى سىنىپتار جاڭارتىلعان مازمۇن بويىنشا ءبىلىم الا باستايدى. ولارعا ارنالعان وقۋلىقتار دايىن. بارلىعى ساراپتامادان ءوتتى، باسىلدى. وقۋلىقتاردى وبلىستارعا جەتكىزۋ جۇمىسى باستالىپ كەتتى»، - دەدى ە. ساعاديەۆ.

ءمينيستردىڭ سوزىنە قاراعاندا، ءبىرقاتار اۋداندارعا وقۋلىقتار ۋاقتىلى جەتپەي قالۋى مۇمكىن.