زەينەتاقى جارناسىن التى ايدا ءبىر اۋدارعاندار ەڭبەك ءوتىلىن سوتتا دالەلدەيدى

استانا. قازاقپارات - زەينەتاقى جۇيەسىنە ەنگىزىلگەن وزگەرىستەر اياسىندا ەڭبەك ءوتىلى دۇرىس ەسەپتەلمەگەن تۇلعالار سوتقا جۇگىنە الادى، دەپ حابارلايدى قازاقپارات ءتىلشىسى.

«2018-جىلدىڭ 1- شىلدەسىنەن باستاپ، ەڭ تومەنگى كۇنكورىس دەڭگەيىنىڭ %50 كولەمىندە تاعايىندالىپ كەلگەن بازالىق زەينەتاقى ەڭبەك وتىلىنە قاراي ەسەپتەلە باستادى. بۇل رەتتە كەي جۇمىس بەرۋشىلەردىڭ تولەمدى دەر كەزىندە اۋدارماي نەمەسە بىرنەشە ايدى قوسىپ، ءبىر رەت تولەم جاساعاندارى انىقتالدى. زاڭ بويىنشا بۇل 1 اي بولىپ قانا ەسەپتەلەدى. ياعني، جىلىنا ەكى رەت جاسالعان تولەم زەينەتاقى جۇيەسىندە ەكى ايلىق ەڭبەك ءوتىلى بولىپ سانالادى. بۇل زاڭدا كورسەتىلگەن، سوندىقتان ادامدار ەڭبەك كىتاپشاسىنداعى جازبالارمەن سوت ارقىلى ەڭبەك ءوتىلىن دالەلدەۋى قاجەت»، - دەدى ەڭبەك جانە حالىقتى الەۋمەتتىك قورعاۋ دەپارتامەنتىنىڭ ءبولىم جەتەكشىسى جانسايا سەكەربەكوۆا ل. ن. گۋميليەۆ اتىنداعى ە ۇ ۋ- دا وتكەن سەميناردا.

سونىمەن بىرگە، دەپارتامەنت وكىلى شتاتتان تىس جۇمىسشىلاردىڭ زەينەتاقى جارنالارى تۋرالى پىكىر ءبىلدىردى.

«قازىر ءبىز ۇكىمەت قاۋلىسى جوباسىنا قول قويىلعانىن كۇتىپ وتىرمىز. وندا جارنا تولەۋى ءتيىس تۇلعالار ناقتىلانادى. سەبەبى، ازاماتتىق-قۇقىقتىق كەلىسىمشارتتاردان تۇسكەن تولەمدەر كورسەتىلگەن قىزمەت ءۇشىن الىنعان اقى بولىپ سانالادى. سوندىقتان، جەكە مۇلىكتى، پاتەر مەن كولىكتى ساتۋدان تۇسكەن قاراجاتتان زەينەتاقىلىق اۋدارىمدار الىنبايدى. مۇنىڭ بارلىعى ق ر ۇكىمەتى قاۋلىسى جوباسىندا ناقتى كورسەتىلەدى. قاۋلى جوباسى قىركۇيەك ايىندا جاريالانادى»، - دەدى ج. سەكەربەكوۆا.