ق ر دەنساۋلىق ساقتاۋ مينيسترلىگى ۆالسارتانى بار پرەپاراتتاردى قايتارىپ الۋ سەبەبىن ءتۇسىندىردى
«ق ر دەنساۋلىق ساقتاۋ مينيسترلىگىنىڭ فارماتسيا كوميتەتى ىشكى تەكسەرىس جۇرگىزۋ بارىسىندا «ۆازار»، «نورتيۆان» جانە «ۆازارن» پرەپاراتتارىنىڭ تىركەۋ كۋالىگىن كەرى قايتارىپ الۋ تۋرالى شەشىم قابىلدادى.
پرەپاراتتار اۋىر دەرتتەرگە قارسى پايدالانىلاتىندىقتان، ەمدەۋشى دارىگەردىڭ نۇسقاۋىنسىز كەرى قايتارىلعان پرەپاراتتاردى قابىلداۋدى دوعارۋعا بولمايدى. بۇل جاعدايدا جوعارىدا اتالعان وندىرۋشىلەردەن شىققان ۆالسارتاندى قابىلدايتىن بارلىق ناۋقاستار باسقا پرەپاراتقا اۋىسۋ ءۇشىن دەرەۋ دارىگەر كەڭەس الۋى قاجەت»، - دەدى ورتالىق كوممۋنيكاتسيالار قىزمەتىنىڭ بريفينگى كەزىندە ق ر دەنساۋلىق ساقتاۋ مينيسترلىگى فارماتسيا كوميتەتى ءتورايىمى ليۋدميلا بيۋرابەكوۆا.
ونىڭ ايتۋىنشا، ءدارى-دارمەكتەر بويىنشا ەۋروپالىق اگەنتتىك، ا ق ش ازىق-تۇلىك ونىمدەرى جانە مەديكامەنتتەرىنىڭ ساپاسىن سانيتارلىق باقىلاۋ جونىندەگى باسقارما قىتايلىق كومپانيا وندىرگەن ۆالسارتان بەلسەندى سۋبستانتسياسىن نارىقتان شىعارۋمەن اينالىسۋدا. وعان بەلسەندى سۋبستانتسياسىنىڭ كەيبىر پارتيالارى پرەپاراتتارىندا قاۋىپتى قوسپانىڭ بولۋى سەبەپشى بولعان.
بۇل دارىلەردى ارتەريالىق قىسىمى جوعارى ناۋقاستار پايدالانادى. قايتارىپ الۋ باستاماسى قىتاي كومپانياسى ۆالسارتان وندىرۋشىلەرىنە جەتكىزەتىن بەلسەندى فارمسۋبستانتسيادان - N- نيتروزوديمەتيلامين (NDMA) تابىلۋىنان كەيىن كوتەرىلدى. NDMA ىقتيمالدى ادام كانتسەروگەنى رەتىندە جىكتەلەدى. ونىڭ ۆالسارتاندا بولۋى بەلسەندى زاتتى ءوندىرۋ ءتاسىلىنىڭ وزگەرۋىنە بايلانىستى دەپ بولجانادى.
الايدا ارنايى تەرگەۋ وتكىزىلمەگەندىكتەن، وندا قانداي قوسپا بارىن جانە ناۋقاستىڭ ومىرىنە نە قاۋىپ توندىرەتىنىن ايتۋعا ءالى ەرتە. بۇل جونىندە بريفينگ بارىسىندا دارىلىك زاتتاردى ساراپتاۋ ۇلتتىق ورتالىعى ديرەكتورىنىڭ ورىنباسارى ارنۇر نۇرتايەۆ ايتتى.
