دارىگەرلەر قىرعىزستاندا زارداپ شەككەن قازاقستاندىقتاردىڭ جاعدايىن ايتىپ بەردى

الماتى. قازاقپارات - الماتىلىق دارىگەرلەر قىرعىزستاندا تاۋدان قۇلاعان تاس كوشكىنى استىندا قالىپ قويىپ زارداپ شەككەندەردىڭ قانداي جاراقات العانىن ايتتى، دەپ حابارلايدى قازاقپارات ءتىلشىسى.

كەشە ءتۇس شاماسىندا الماتى اۋەجايىنا بىشكەك ماڭىنداعى تاۋدا تاس كوشكىنىنەن زارداپ شەككەن تۋريستەر تىكۇشاقپەن جەتكىزىلدى.

قالالىق دەنساۋلىق ساقتاۋ باسقارماسىندا حابارلاعانداي، ناۋقاستاردى تەكسەرۋگە 4 جەدەل جاردەم بريگاداسى شىقتى.

«2 ناۋقاس (قازاقستان ازاماتتارى) جەدەل جاردەم دارىگەرلەرىنە قارالىپ، اۋرۋحاناعا بارۋدان باس تارتتى. قالعان 4 ناۋقاس (ەكەۋى قازاقستان ازاماتى، ەكەۋى ر ف ازاماتى) 4№ كلينيكالىق اۋرۋحاناعا جەتكىزىلدى. ارنايى زەرتتەۋلەر، دياگنوستيكالىق تەكسەرۋلەردەن ءوتتى. تورتەۋى دە جاراقاتى جەڭىل بولعان سوڭ ۇيلەرىنە جىبەرىلدى»، - دەدى قالالىق دەنساۋلىق ساقتاۋ باسقارماسى باسشىسىنىڭ ورىنباسارى نۇرجان يسابەكوۆ.

ونىڭ ايتۋىنشا، ەر ادامداردى قاراۋ بارىسىندا بارلىعىنىڭ تەرىسىنىڭ سىرىلۋى، قولى جانە اياقتارىنىڭ جاراقاتتارى، ىشتەرىنە زاقىم كەلۋى انىقتالعان.

ەر ادامداردىڭ ەڭ ۇلكەنى 50 جاستا بولسا، ەڭ جاسى 26 جاستا ەكەن.

ەسكە سالايىق، 30- شىلدەدە قىرعىزستان اۋماعىندا بىشكەك قالاسىنان 40 شاقىرىم قاشىقتىقتا سكريابين مۇزدىعى اۋدانىندا ءبىر توپ تۋريستەر تاسقۇلاماعا تاپ بولعان ەدى. زارداپ شەگۋشىلەردىڭ اراسىندا ءتورت قازاقستان ازاماتى بار. ق ر سىرتقى ىستەر مينيسترلىگى قىرعىزستانداعى تاسقۇلاما كەزىندە قازاقستاندىقتىڭ مەرت بولعانىن راستادى.