قازاقستاندا زەينەتاقىدان باس تارتقان ادامدار بار

استانا. قازاقپارات - ق ر ەڭبەك جانە حالىقتى الەۋمەتتىك قورعاۋ ۆيتسە- ءمينيسترى سۆەتلانا جاقىپوۆا زەينەتاقىدان باس تارتۋ وقيعاسى تۋرالى ايتىپ بەردى، دەپ حابارلايدى قازاقپارات ءتىلشىسى.

 «مەن مينيسترلىككە كەلگەلى بەرى ءبىر رەت قانا ونداي جاعدايعا تاپ بولدىم. قازاق ەلىنە بەلگىلى ازامات، تۇلعا دەۋگە بولادى، زەينەتاقىدان باس تارتتى. ول كىسى 20 جىل بويى زەينەتاقىعا ءوتىنىش بەرمەي ءجۇردى. «مەملەكەتىمە راقمەت، بارىنە شۇكىر- ءتاۋبا، وسى ۋاقىتقا دەيىن جيىپ- تەرگەنىم وزىمە جەتەدى» دەيدى. ول ەلشى بولىپ جۇمىس ىستەگەن»، - دەدى س. جاقىپوۆا ۇكىمەت ۇيىندە وتكەن باسپا ءسوز ءماسليحاتىندا.

ونىڭ ايتۋىنشا، ول ادام ءبىراز ۋاقىت ءوتىنىش جازباي جۇرسە دە، ارتىنان زەينەتاقى الۋعا كەلىسكەن.

 «ءبىز ونىمەن سويلەستىك، ءبارىن تۇسىندىردىك. نەگىزى، زاڭ بويىنشا زەينەت جاسىنا كەلگەن ادام قۇزىرەتتى ورگانعا بارىپ، ءوتىنىش بەرۋى كەرەك. ول كىسى ءوتىنىش بەرگەن جوق. ءبىز ونىمەن جۇمىس جۇرگىزدىك. ايتىپ تۇسىندىرگەننەن كەيىن ءوتىنىشىن الدىق. بىلتىردان باستاپ تولەمدەردى بەرە باستادىق»، - دەدى س. جاقىپوۆا قازاقپارات تىلشىسىنە بەرگەن سۇحباتىندا.

ايتا كەتەيىك، بۇگىنگى باسپا ءسوز ءماسليحاتىندا سۆەتلانا قابىكەن قىزى زەينەتاقى تولەمدەرىن اۋدارۋ ءتارتىبىن ءتۇسىندىردى.

«قازىر الەۋمەتتىك جەلىلەردە قاراسام، «كولىك پەن پاتەر ساتۋدان زەينەتاقى جارناسىن ۇستايدى» دەپ جازىپ جاتىر. ولاي ەمەس. ونداي تابىستان زەينەتاقى جارنالارى ۇستالمايدى. سىزدەر جۇمىس جاساۋ، ءيا بولماسا، قىزمەت كورسەتۋ ارقىلى تابىس تاپساڭىز عانا زەينەتاقى جارناسى ۇستالادى. قازىر جۇمىس بەرۋشىلەر ونداي كەلىسىمشارتتاردى جاسايدى دا، زەينەتاقى جارنالارىن تولەمەي جۇرەدى»، - دەدى س. جاقىپوۆا.

اۆتور: ارمان اسقاروۆ