زەينەتاقى قورىنا قانداي كىرىستەن جارنا اۋدارىلادى

استانا. قازاقپارات - ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى سۆەتلانا جاقىپوۆا قانداي كىرىستەن زەينەتاقى جارناسى اۋدارىلاتىندىعىن ءتۇسىندىردى، دەپ حابارلايدى قازاقپارات ءتىلشىسى.

«بارلىق زەينەتاقى اۋدارىمدارى ازاماتتاردىڭ تاپقان تابىستارىنان عانا تولەنەدى. ماسەلەن، كاسىپورىن جۇمىسشىلارى ءۇشىن تاپقان تابىسى ونىڭ جالاقىسى، جەكە كاسىپكەر ءۇشىن - بۇل تىكەلەي كاسىپكەرلىك قىزمەتتەن الىنعان كىرىس، جەكە نوتاريۋستار ءۇشىن - بۇل ولار كورسەتكەن قىزمەتتەن تۇسكەن تابىس سانالادى. ال وتەماقىلى شارت (ازاماتتىق- قۇقىقتىق شارت دەپ اتالادى) نەگىزىندە زاڭدى نەمەسە جەكە تۇلعا ءۇشىن جۇمىستاردىڭ نەمەسە قىزمەتتەردىڭ بەلگىلى ءبىر ءتۇرىن ورىندايتىن ازاماتتار ءۇشىن مىندەتتى زەينەتاقى جارناسى اتالعان جۇمىستاردى نەمەسە قىزمەتتەردى (جەكە مۇلكىن ساتۋدان ەمەس) ورىنداۋ ناتيجەسىندە الىناتىن كىرىستەر تولەنەدى»، - دەپ جازدى ۆيتسە- مينيستر فەيسبۋكتەگى پاراقشاسىندا.

سۆەتلانا جاقىپوۆا قازاقستان رەسپۋبليكاسىنىڭ زەينەتاقىمەن قامتاماسىز ەتۋ تۋرالى زاڭىنىڭ 25 -بابىندا ءبىرىڭعاي جيناقتاۋشى زەينەتاقى قورىنا تولەۋگە جاتاتىن مىندەتتى زەينەتاقى جارناسى ايلىق تابىستىڭ 10 پايىزى مولشەرىندە بەلگىلەنگەنىن ەسكە سالىپ وتەدى.

«زاڭعا ەنگىزىلگەن تۇزەتۋلەرگە سايكەس اعىمداعى جىلدىڭ 14 -شىلدەسىنەن باستاپ ازاماتتىق- قۇقىقتىق سيپاتتاعى شارت بويىشا تابىس الاتىن جەكە تۇلعالار، سونىمەن قاتار ادۆوكاتتار، جەكە سوت ورىنداۋشىلارى، جەكە نوتاريستەر، كاسىبي مەدياتورلار، جەكە كاسىپكەرلەر ءبىرىڭعاي جيناقتاۋشى زەينەتاقى قورىنا تولەمگە جاتاتىن تابىسىنان ءوز پايداسىنا مىندەتتى زەينەتاقى تولەمدەرىن جۇزەگە اسىرادى»، - دەپ جازادى ول.

سونىمەن قاتار ول ازاماتتىق- قۇقىقتىق سيپاتتاعى شارت اياسىندا الىنعان جەكە تۇلعالاردىڭ تابىسى رەتىندە ازاماتتاردىڭ ورىنداعان جۇمىستارى نەمەسە كورسەتكەن قىزمەتى ناتيجەسىندە الىنعان تابىسى ايقىندالعانىن اتاپ وتەدى.

«وسىعان وراي قازاقستان رەسپۋبليكاسىنىڭ «الەۋمەتتىك قامسىزداندىرۋ ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭى اياسىندا قابىلدانعان تۇزەتۋلەردى جۇزەگە اسىرۋ ءۇشىن قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ مينيسترلىگى قازاقستان رەسپۋبليكاسى ۇكىمەتىنىڭ «الەۋمەتتىك قامسىزداندىرۋ ماسەلەلەرى بويىنشا قازاقستان رەسپۋبليكاسى ۇكىمەتىنىڭ كەيبىر شەشىمدەرىنە وزگەرىستەر ەنگىزۋ تۋرالى» قاۋلىسىنىڭ جوباسىن ازىرلەدى. قاۋلى جوباسى ازاماتتىق- قۇقىقتىق سيپاتتاعى شارت بويىنشا تابىس الاتىن جەكە تۇلعالاردىڭ مىندەتتى زەينەتاقى جارنالارىن تولەۋ ءتارتىبى مەن مەرزىمىن دە ايقىنداۋدى قاراستىرادى. بۇگىنگى كۇنى جوبا مۇددەلى مەملەكەتتىك ورگاندارمەن، ساراپشىلىق كەڭەستەرمەن جانە اككرەديتتەلگەن ۇيىمدارمەن كەلىسۋ پروتسەدۋراسىنان وتۋدە»، - دەدى سۆەتلانا جاقىپوۆا.

ەسكە سالا كەتسەك، «زەينەتاقىمەن قامتاماسىز ەتۋ» تۋرالى زاڭعا وزگەرىستەر ەنگەن بولاتىن. زاڭعا سايكەس ازاماتتىق- قۇقىقتىق سيپاتتاعى شارتتار بويىنشا تابىس الاتىن جەكە تۇلعالار زەينەتاقى تولەمىن جاساۋعا مىندەتتەلگەن ەدى.

وسىعان وراي ب ج ز ق باسقارماسى ءتوراعاسىنىڭ ورىنباسارى ساۋلە ەگەۋبايەۆا ۋاقتىلى تولەم جاساماعان فريلانسەرلەردىڭ قانداي جاۋاپكەرشىلىككە تارتىلاتىنى تۋرالى ايتقان بولاتىن.

«ۋاقتىلى جارنا تولەمەگەن اگەنتتەر ءۇشىن ءوسىم قاراستىرىلادى. اگەنت دەگەنىمىز مىندەتتى زەينەتاقى جارناسىنا اقشا اۋدارۋعا ءتيىس زاڭدى، جەكە تۇلعالار. اكىمشىلىك قۇقىقبۇزۋشىلىق تۋرالى زاڭ تۇرعىسىنان ولارعا ءبىرىنشى كەزدە ايىپپۇل سالىنىپ، قايتالانعان جاعدايدا جاۋاپقا تارتىلادى»، - باسقارما ءتوراعاسىنىڭ ورىنباسارى ساۋلە ەگەۋبايەۆا.

ونىڭ ايتۋىنشا، 2020 -جىلعا قاراي ەلىمىزدە جالپى تابىستى دەكلاراتسيالاۋ شارالارى ەنگىزىلەدى. سوعان سايكەس باسىبايلى تابىستى انىقتاۋ باستالادى. زەينەتاقى جارناسىن دۇرىس تارتىپتە ءارى ۋاقتىلى جاساۋدى مەملەكەتتىك كىرىستەر ورگاندارى قاداعالايدى. «جاڭا تارتىپكە سايكەس ازاماتتىق- قۇقىقتىق سيپاتتاعى شارتتار بويىنشا تابىس تاۋىپ وتىرعان جەكە تۇلعالار مەن جەكە كاسىپكەرلەردىڭ ايلىق كىرىسى ەسەپتەلەدى. سودان ەكىنشى دەڭگەيلى بانكتەر ارقىلى %10 وندىرىلەدى»، - دەدى ساۋلە ەگەۋبايەۆا.