تۇرمەلەر سانىن قىسقارتۋدىڭ پايداسى قانداي
«2012 -جىلدان بەرى ءبىز 8 كولونيانى قىسقارتتىق. سوندا ءبىر جىلدىڭ ىشىندە 12 ميلليارد تەڭگە ۇنەمدەلىپ وتىر. ال ول اقشانى پروباتسياعا، قىلمىستىڭ الدىن الۋ شارالارىنا جۇمساۋعا مۇمكىندىك بار. سوسىن قوعام ءۇشىن ادامنىڭ جۇمىس ىستەگەنى ءتيىمدى عوي. ايتپەسە، ونى تۇرمەدە ۇستاۋ ءۇشىن قىرۋار اقشا جۇمسالادى. ول جەردەگى ءداستۇرلى ەمەس ءدىني اعىمدار دا بولادى. سوعان قوسىلىپ، تۇرمە مادەنيەتىن ناسيحاتتاعانشا قوعامنىڭ بەلسەندى وكىلى بولىپ، ەلگە ەڭبەك سىڭىرگەن جاقسى ەمەس پە؟ مىنە، تۇرمەلەردى قىسقارتۋدىڭ ءتيىمدى تۇسى وسى»، - دەدى م. احمەتجانوۆ استانادا وتكەن باسپا ءسوز ءماسليحاتىندا.
ونىڭ ايتۋىنشا، قازىرگى كەزدە استاناداعى قاتاڭ رەجيمدەگى تۇرمە جابىلىپ جاتىر. ونىڭ ورنىنا جەڭىل تارتىپتەگى كولونيا اشىلادى.
«بۇرىن قاتاڭ، ورتا جانە جەڭىل رەجيمدى تۇرمەلەر بولسا، قازىر ارالاستىرىپ سالىپ جاتىرمىز. مىسالى، قىزىلوردا جاقتا سونداي تۇرمە اشىلىپ وتىر. بۇرىن قىزىلوردا ماڭايىندا تەك قاتاڭ رەجيمدى مەكەمەلەر عانا بولدى. ال جەڭىل جازامەن سوتتالعان جەرگىلىكتى ازاماتتاردى باسقا ايماقتارعا جىبەرۋگە تۋرا كەلدى. سول سەبەپتى ارالاس مەكەمەلەردى سالۋ تۋرالى شەشىم قابىلداندى. سوندا ازاماتتار ءوز جەرىندە، تۋعان-تۋىستاردىڭ قاسىندا جازاسىن وتەيدى. اتالعان شارالار ءالى دە جالعاسادى»، - دەپ اتاپ كورسەتتى م. احمەتجانوۆ.
ايتا كەتەيىك، بۇگىنگى باسپا ءسوز ءماسليحاتىندا م. احمەتجانوۆ 5 مىڭ ادامدى تۇرمەدەن بوساتۋعا قاتىستى تۇسىنىك بەردى.
«بۇگىندە الەۋمەتتىك جەلىلەردە شىندىققا جاناسپايتىن اقپاراتتار تارالۋدا. اۋىر قىلمىس جاساعان 5 مىڭ ادام شىعادى دەيدى. ولار زورلىق جاساعان، ادام ولتىرگەن، قاراقشىلىق جاساعان دەيدى. بۇقارالىق اقپارات قۇرالدارىنا دا جاڭالىقتار شىقتى. بۇنىڭ بارلىعى شىندىققا جاناسپايدى. بىرەۋلەر ماسەلەنىڭ انىق- قانىعىنا ءمان بەرمەدى، ەندى بىرەۋلەر سەنساتسيا جاسايمىز دەپ، سولاي بەردى. سونىڭ سالدارىنان قوعام ول جاڭالىقتى دۇرىس تۇسىنبەي قالدى»، - دەپ اتاپ كورسەتتى م. احمەتجانوۆ. ونىڭ ايتۋىنشا، 5 مىڭ ادامنىڭ ىشىندە قاراقشىلار، پەدوفيلدەر، زورلىق جاساعاندار، ادام ولتىرگەن باسبۇزارلار جوق.
