ءى ءى م دەنيس تەننىڭ ولىمىنە قاتىستى تاراعان قاۋەسەتتەرگە جاۋاپ بەردى

استانا. قازاقپارات - دەنيس تەننىڭ ولىمىنە قاتىستى كۇدىكتىلەر بويىنشا ناقتى دالەلدەر بار.

بۇل تۋرالى ق ر ىشكى ىستەر ءمينيسترىنىڭ ورىنباسارى راشيد جاقىپوۆ دەنيس تەن ولىمىنە قاتىستى تەرگەۋ تۋرالى بريفينگتە ايتتى، دەپ حابارلايدى قازاقپارات.

«بۇگىندە ب ا ق- تىڭ جانە قوعامنىڭ نازارى الماتىدا ورىن العان رەزونانستىق قىلمىسقا اۋدارىلىپ وتىر. بۇل قىلمىستى جاساعاندار انىقتالىپ، ۇستالدى. قىلمىستىق ءىستىڭ ءمان-جايىن انىقتاۋعا باعىتتالعان تەرگەۋ شارالارى ءجۇرىپ جاتىر. سونىمەن قاتار، ءتيىستى ساراپتامالار دا جاسالۋدا»، - دەپ توقتالدى ءمينيستردىڭ ورىنباسارى.

بۇدان بولەك ول الەۋمەتتىك جەلىلەردە تاراپ جاتقان پىكىرلەرگە دە توقتالىپ ءوتتى.

«ءبىز الەۋمەتتىك جەلىلەردەگى پىكىرلەر مەن بۇقارالىق اقپارات قۇرالدارىنداعى ماقالالاردى وقىدىق. اتاپ ايتقاندا، پوليتسيا ءبىرىنشى كەزدەسكەن ادامداردى ۇستاپ الدى دەگەن قاۋەسەت شىندىققا جاناسپايدى. اتالعان قىلمىستى جاساعان ناقتى ادامدار انىقتالدى. وسى ورايدا، ولاردىڭ بۇل قىلمىسقا قاتىستىلىعى بويىنشا بۇلتارتپايتىن دالەلدەر بار»، - دەدى راشيد جاقىپوۆ.

ايتا كەتسەك، قازاقستاندىق مانەرلەپ سىرعاناۋشى دەنيس تەن 19- شىلدە كۇنى پىشاق جاراقاتىنان قازا بولعان ەدى. وقيعا قۇرمانعازى بايسەيىتوۆا كوشەلەرىنىڭ قيىلىسىندا 19- شىلدەدە تۇسكى ساعات 15:00 شاماسىندا بولعان. سپورتشى كولىگىنىڭ ايناسىن ۇرلاماق بولعان ەكى ادامنىڭ ۇستىنەن تۇسكەن. ارادا باستالعان جانجالدىڭ سالدارىنان ۇرىلار دەنيس تەنگە پىشاق سۇعىپ العان. ول وڭ جاق سانىنىڭ جوعارعى تۇسىنا جاراقات الدى. 25 جاستاعى تەن ءۇش ليتر قان جوعالتىپ، اۋرۋحاناعا وتە اۋىر جاعدايدا جەتكىزىلدى. ءبىراق الماتى قالالىق دەنساۋلىق ساقتاۋ باسقارماسىنىڭ باسشىسى سەرىكبول مۋسينوۆ قوسىمشا قان قاجەت ەمەستىگىن جانە رەسۋرستار جەتكىلىكتى ەكەندىگىن ءمالىم ەتكەن بولاتىن.

2,5 ساعاتقا جالعاسقان رەانيماتسيالىق شارالارعا قاراماستان، اۋرۋحانا دارىگەرلەرى ونىڭ ومىرىنە اراشا تۇسە المادى. ساعات 17.30-دا وليمپيادا جۇلدەگەرى قايتىس بولدى.

ادام ءولتىرۋ بابىمەن قىلمىستىق ءىس قوزعالدى.