09:03, 04 - شىلدە 2018 | GMT +5
نۇرسۇلتان نازاربايەۆ بالا كەزىندە قالاي تابىس تاپقانىن ايتىپ بەردى
استانا. قازاقپارات - قازاقستان پرەزيدەنتى بالا كەزىندە قالاي تابىس تاپقانى تۋرالى ەستەلىكتەرىمەن ءبولىستى، دەپ حابارلايدى قازاقپارات ءتىلشىسى.
«مەن باقتا تۋعان اداممىن. مەنىڭ اكەم باعبانشى بولعان كىسى. ءبىزدىڭ ءۇيدىڭ اينالاسىندا 25 سوتىق جەر بولدى. سول ۋاقىتتا ول ايتارلىقتاي اۋقىمدى الاڭ بولاتىن. سول اۋماقتىڭ بارىندە الما جايقالىپ ءوسىپ تۇراتىن. اكەم مەنى باۋلىپ، «مۇندا الما»، «مۇندا المۇرت» دەپ كورسەتىپ جۇرەتىن» ، - دەگەن پرەزيدەنتتىڭ شاعىن اڭگىمەسى اقوردانىڭ ينستاگرامداعى پاراقشاسىندا جاريالاندى.
پرەزيدەنتتىڭ ايتۋىنشا، ول المانى باپتاۋدى بالا كەزدەن ۇيرەنگەن.
«مەن وسى باقتا ءوستىم. المانى باپتاپ ءوسىرۋدى، ونى ءاردايىم تۇپتەپ، ۋاقىتىندا سۋارۋدى، ءاربىر المانى جۇلعان كەزدە شاڭىن تۇسىرمەي قويماعا سالىپ قويۋدى ۇيرەندىم. سول المانى كوكتەمدە الماتىدا ساتاتىن ەدىك. بۇل ءبىزدىڭ وتباسىمىزدىڭ تابىسى بولاتىن»، - دەيدى ەلباسى.
