ەلباسىنىڭ قاتىسۋىمەن «نۇر وتان» پارتياسى ساياسي كەڭەسىنىڭ وتىرىسى باستالدى

استانا. قازاقپارات - استانادا قازاقستان پرەزيدەنتى نۇرسۇلتان نازاربايەۆتىڭ قاتىسۋىمەن «نۇر وتان» پارتياسى ساياسي كەڭەسىنىڭ كەڭەيتىلگەن وتىرىسى باستالدى، دەپ حابارلايدى قازاقپارات ءتىلشىسى.

وتىرىس ەلورداداعى تاۋەلسىزدىك سارايىندا ءوتىپ جاتىر. شارا بارىسىندا «نۇر وتان» پارتياسىن جۇيەلى تۇردە جاڭعىرتۋ بويىنشا جۇمىس بارىسى تالقىلانادى. سونىمەن قاتار، قازاقستان پرەزيدەنتىنىڭ بەس الەۋمەتتىك باستاماسىن جۇزەگە اسىرۋ باعىتىندا قوعامدىق باقىلاۋدى ۇيىمداستىرۋ ماسەلەلەرى قارالماق. جيىنعا پارلامەنت دەپۋتاتتارى، ۇكىمەت جانە جەرگىلىكتى اتقارۋشى ورگانداردىڭ مۇشەلەرى قاتىسۋدا.

«نۇر وتان» پارتياسى ساياسي كەڭەسىنىڭ وتىرىسى تەك مەملەكەت باسشىسى- پارتيا ءتوراعاسىنىڭ نەمەسە ساياسي بيۋرونىڭ شاقىرتۋىمەن جىلىنا ءبىر رەت ۇيىمداستىرىلادى. 2017 -جىلى 3 -قاراشادا وتكەن جيىندا مەملەكەت باسشىسى پارتيانى جۇيەلى تۇردە جاڭعىرتۋ ماسەلەلەسىن الدىڭعى قاتارعا قويعان ەدى.

ەسكە سالا كەتسەك، وتكەن جىلدىڭ جەلتوقسانىندا ساياسي كەڭەس بيۋروسىنىڭ قاۋلىسىمەن پارتيانى جاڭعىرتۋدىڭ ناقتى جوسپارى بەكىتىلگەن بولاتىن. وندا جەتى باعىت بويىنشا شارالاردى ىسكە اسىرۋ، اتاپ ايتقاندا، پارتيالىق كادرلارمەن جۇمىستى كۇشەيتۋ، جەرگىلىكتى وكىلدىك ورگاندارىندا پارتيانىڭ ءرولىن ارتتىرۋ، ونىڭ جالپىۇلتتىق كۇن ءتارتىبىن قۇرۋدا بەلسەندى تۇردە ارالاسۋىن قامتۋ، پارتيالىق تەحنولوگيالاردى جەتىلدىرۋ، جاستارمەن بەلسەندى جۇمىس جۇرگىزۋ، اناليتيكالىق الەۋەتتى ءوسىرۋ مەن پارتيالىق ءبىلىم ساپاسىن ارتتىرۋ قاراستىرىلعان ەدى.