ۇكىمەت باسشىسى استانانى شەتەلدىك ازىق-تۇلىكتەن ارىلتۋ جولدارىن اتادى

بۇل تۋرالى ماجىلىسمەندەردىڭ دەپۋتاتتىق ساۋالىنا بەرگەن جاۋابىندا ۇكىمەت باسشىسى باقىتجان ساعىنتايەۆ ايتتى، دەپ حابارلايدى قازاقپارات ءتىلشىسى.
ايتا كەتسەك، بۇدان بۇرىن پارلامەنت ءماجىلىسىنىڭ وتىرىسىندا «حالىق كوممۋنيستەرى» فراكسياسىنىڭ مۇشەلەرى استانانى قاجەتتى ونىمدەرمەن جانە تاۋارلارمەن قامتۋ ءۇشىن ازىق- تۇلىك بەلدەۋىندەگى ماسەلەلەردى شەشۋ كەرەكتىگىن ايتىپ، ۇكىمەت باسشىسىنا دەپۋتاتتىق ساۋال جولداعان بولاتىن. ولاردىڭ ايتۋىنشا، سوڭعى 2 جىلدا ەلورداعا 42 ميلليارد تەڭگەنىڭ ازىق- تۇلىگى شەتەلدەن يمپورتتالعان.
«بۇل جاعداي وتاندىق اۋىل شارۋاشىلىعى تاۋارىن وندىرۋشىلەرگە جايسىز ءتيىپ تۇر»، - دەپ ەسەپتەيدى ماجىلىسمەندەر.
بۇل ساۋالعا جۋىقتا ۇكىمەت باسشىسى باقىتجان ساعىنتايەۆ جاۋاپ بەردى. پرەمەر-ءمينيستردىڭ جاۋابىنا سايكەس، اتالعان ماسەلەلەردى شەشۋ ءۇشىن اۋىل شارۋاشىلىعى مينيسترلىگى، استانا قالاسى، اقمولا جانە قاراعاندى وبلىستارىنىڭ اكىمدىكتەرى 2018-2021 -جىلدارى استانا اينالاسىندا ازىق- تۇلىكتىك بەلدەۋىن قۇرۋ بويىنشا جول كارتاسىن جاساپ جاتىر.
«ول كارتا ازىق- تۇلىك بەلدەۋى اۋماعىنداعى جەتىسپەيتىن كوكونىس پەن جەمىستى ءوسىرۋ ءۇشىن سۋارمالى جەرلەردى قالپىنا كەلتىرۋ، ءسۇت وڭدەيتىن كاسىپورىندار تولىق قۋاتتا جۇمىس ىستەيتىندەي ءسۇت- تاۋارلى فەرمالاردى اشۋ، قالاداعى ەت ونىمدەرىنىڭ جەتىسپەۋشىلىگىن شەشۋ ماقساتىندا ەت وڭدەيتىن كاسىپورىنداردى تۇرعىزۋ بويىنشا شارالار لەگىن ىسكە اسىرۋدى كوزدەيدى. سونىمەن قاتار، اتالعان شارالاردى جۇزەگە اسىرۋ ءۇشىن ولاردىڭ قارجىلاندىرۋىن استاناداعى، اقمولا مەن قاراعاندى وبلىستارىنداعى الەۋمەتتىك- كاسىپكەرلىك كورپوراتسيالاردىڭ، سونداي- اق ينۆەستورلاردىڭ، رەسپۋبليكالىق جانە جەرگىلىكتى بيۋدجەتتىڭ قاتىستىرىلۋىمەن جۇزەگە اسىرۋ ۇسىنىلۋدا»، - دەپ جاۋاپ بەردى ۇكىمەت باسشىسى.
سونىمەن قاتار، جول كارتاسى بويىنشا كاسىپكەرلەرگە «ەلوردانىڭ ازىق- تۇلىك بەلدەۋىنە قاتىسۋشى» مارتەبەسىن بەرۋ كوزدەلگەن. بۇل ازىق- تۇلىكتىك اۋماقتىڭ جانە وزگە دە ايماقتاردا وندىرىلگەن ازىق- تۇلىكتى استاناعا تۇراقتى تۇردە جەتكىزىپ تۇرۋعا كەپىلدىك بەرەتىن بولادى.
«استانانىڭ ازىق-تۇلىك بەلدەۋىنە قاتىسۋشى» مارتەبەسىن يەلەنگەن اۋىل شارۋاشىلىعى تاۋارىن وندىرۋشىلەرگە سۋبسيديالار، «قازاگرو» ۇ ب ح» ا ق- نىڭ ەنشىلەس اكسيونەرلىك قوعامدارىنان نەسيە الۋ، وتكىزۋ نارىعىنا يە بولۋ مۇمكىندىكتەرى بەرىلمەك. وسىلايشا، اۋىل شارۋاشىلىعى تاۋارىن وندىرۋشىلەرگە ەلوردانىڭ نارىعىنا وزدەرىنىڭ ونىمدەرىن تاسىمالداپ تۇرۋعا مۇددەلى بولادى»، - دەلىنگەن جاۋاپتا.
جول كارتاسى سونىمەن بىرگە، ەلوردا ايماعىنداعى ساۋدا-لوگيستيكالىق ينفراقۇرىلىمدى دامىتۋ ماسەلەلەرىن دە شەشۋگە باعىتتالعان. ناقتىراق ايتقاندا، استانا قالاسىندا كوتەرمە- ءبولۋ ورتالىعىن اشۋ كوزدەلىپ وتىر.
«ونىڭ باستى ماقساتى - وتاندىق اۋىل شارۋاشىلىعى تاۋارىن وندىرۋشىلەرىنە نارىقتاعى كوتەرمە ساتىپ الۋشىلارعا تىكەلەي شىعاتىنداي جاعداي جاساۋ. بۇل نارىقتا «ادىلەتتى» باعامەن ساۋدا جاساۋعا عانا ەمەس، ازىق- تۇلىكتى ساقتاۋ شىعىنىن قىسقارتۋعا، اۋىل شارۋاشىلىعى تاۋارىن وندىرۋشىلەرىنىڭ تاۋار اينالىمىن ارتتىرۋعا جول اشادى. سونىمەن بىرگە، وسىنداي ورتالىقتىڭ جۇمىس ىستەپ تۇرعانى وتاندىق اۋىل شارۋاشىلىعى تاۋارىن وندىرۋشىلەرىنىڭ نارىقتاعى ءبىلىمىن ارتتىرۋعا مۇمكىندىك بەرەدى»، - دەپ جاۋاپ بەردى باقىتجان ساعىنتايەۆ.