وتاندى ءسۇيۋدى، قازاق ءتىلىن قۇرمەتتەۋدى اتا-انامنان ۇيرەندىم - ناتاليا دەمەنتيەۆا

بۇل تۋرالى قازاقپارات تىلشىسىنە «قازاقستاننىڭ 100 جاڭا ەسىمى» بايقاۋىنا قاتىسۋشى، بۇگىندە كوكشەتاۋ گۋمانيتارلىق- تەحنيكالىق ليتسەيىنىڭ ديرەكتورى، قازاقستان حالقى اسسامبلەياسى اقمولا فيليالىنىڭ مۇشەسى ناتاليا دەمەنتيەۆا ايتتى.
كەيىپكەرىمىزدىڭ ايتۋىنشا، قازاقستان تاۋەلسىزدىك جىلدارى تاعلىمدى جولدان ءوتىپ، الەم نازارىن وزىنە اۋداردى. مەملەكەت باسشىسى نۇرسۇلتان نازاربايەۆ وسىناۋ ءىرى جەتىستىكتى حالىقتار دوستىعىمەن، ەل ىشىندەگى تۇراقتىلىقپەن بايلانىستىرادى.
«قازاقستاننىڭ 100 جاڭا ەسىمى» بايقاۋى - كوپۇلتتى مەملەكەتىمىزدىڭ دامۋىنا ەلەۋلى ۇلەس قوسقان وتانداستار تاعدىرىن كەڭىنەن ناسيحاتتاۋ، جاستارعا ۇلگى ەتۋ. بۇل ىنتىماق ۇيتقىسىنا اينالعان قازاقستان حالقى اسسامبلەياسىنىڭ جارقىن قىزمەتىمەن دە ساباقتاس.
«مەن قازاقستاننىڭ قاراپايىم قىزى رەتىندە وتانىمنىڭ گۇلدەنۋىن ءومىرىمنىڭ باستى ءمانى سانايمىن. ءوز زامانداستارىمىزدىڭ بەلسەندى ۇستانىم يەسى ەكەندىگىن ماقتان ەتەمىن. ويتكەنى، ءبىز ۇنەمى قوزعالىستاعى، ىزگى تىلەكتەردەگى ەلدىڭ ازاماتتارىمىز. اقمولا اسسامبلەياسىنىڭ مۇشەسى ۇنەمى الدا بولۋى قاجەت دەپ سانايمىن. «نۇر وتان» پارتياسىنىڭ كوپ ارنالى جۇمىستارىنىڭ ورتاسىندا جۇرۋگە تىرىسامىن»، - دەيدى ناتاليا دەمەنتيەۆا.
قازىرگى كۇنى كەيىپكەرىمىز كوكشەتاۋ گۋمانيتارلىق-تەحنيكالىق ليتسەيىنىڭ ديرەكتورى قىزمەتتىن ابىرويمەن اتقارۋدا. ءوزىنىڭ وتانعا، ونىڭ تىلىنە دەگەن ماحابباتىن اتا- اناسىنان دارىعانىن ايتۋدا. ال كوپشىلىك الدىندا ءوزىن ۇستاۋدى ناتاليا مەملەكەتتىك ءتىلدى مەڭگەرۋشىلەر اراسىندا وتكەن بايقاۋدا، سونىمەن قاتار تەلەاردا اۆتورلىق باعدارلاما جۇرگىزۋ ارقىلى ۇيرەنگەن.
«مەنىڭ اتا-انام ۇيىمىزدەگى بالالاردىڭ بارلىعىنا وتاندى ءسۇيۋ، قازاق ءتىلىن قۇرمەتتەۋ سەزىمىن ۇيالاتا ءبىلدى. ءوزىم پەداگوگيكالىق ۋنيۆەرسيتەتتىڭ قازاق ءبولىمىن ءبىتىردىم. العاشقى ەڭبەك جولىم دا مەملەكەتتىك تىلگە قىزمەت ەتۋمەن بايلانىستى بولدى. پەداگوگتىق جۇمىسىمدى وبلىستىق تەلەۆيدەنيەدەگى «مىڭ ءبىر ءسوز»، «تانىمال»، «پود ەدينىم شانىراكوم»، «اق داستارحان»، «مى ناۋچيليس!»، «جيۆوي رودنيك» سياقتى اۆتورلىق باعدارلامالاردىڭ جۇرگىزۋشىلىگىمەن جالعاستىردىم.
اتالعان باعدارلامالاردىڭ بارلىعى مەن ءۇشىن ىستىق. وندا مەملەكەتتىك ءتىلدى مەڭگەرۋ، دارىپتەۋمەن بىرگە دوستىق، بىرلىك يدەيالارى كەڭىنەن ءسوز بولدى. اقمولا وبلىستىق اسسامبلەياسىمەن بىرلەسكەن جوبا قازىرگى كۇنى جاڭا مازمۇنمەن كورەرمەندەردىڭ كوزايىمىنا اينالىپ وتىر. مەنىڭ وسىنداي قاراپايىم ەڭبەگىم باعالانىپ، جەتى جەرلەسىممەن بىرگە «قازاقستاننىڭ 100 جاڭا ەسىمى» اتاناۋىمنىڭ ءوزى ورتاق ءۇيىمىزدىڭ شاڭىراعى بيىك، ماقساتى اسقاق ەكەندىگىن كورسەتتى»، - دەپ ءسوزىن قورتىندىلادى كەيىپكەرىمىز.
فوتو: atyrau.assembly.kz