زەرەندىدە جاڭا نىساندار اشىلادى

كوكشەتاۋ. قازاقپارات - اقمولا وبلىسىنىڭ زەرەندى اۋدانىندا جازدا 3 جاڭا نىسان اشىلادى. بۇل تۋرالى ايماق باسشىسى مالىك ءمىرزاليننىڭ اۋدانعا جۇمىس ساپارى بارىسىندا ايتىلدى، دەپ حابارلايدى قازاقپارات ءتىلشىسى اكىمدىكتىڭ باسپا ءسوز قىزمەتىنە سىلتەمە جاساپ.
None
None

  ايماق باسشىسى كۋرورتتى وڭىردە تۋريستىك نىسانداردىڭ قۇرىلىسى جانە اباتتاندىرۋ جۇمىستارىنىڭ بارىسىمەن تانىستى. بيىلعى جىلى كۋرورتتى وڭىردە ءقوناقۇي نارىعىندا ءۇش جاڭا تۋريستىك نىساندى قولدانىسقا بەرۋ جوسپارلانىپ وتىر. ونىڭ ءبىرى 2 قاباتتى جازعى بەس ۇيشىكتەن تۇراتىن «زەرەندى پارك» قوناقۇي كەشەنى. وندا دەمالۋشىلار ءۇشىن سپورتتىق جانە بالالار الاڭى، وتىراتىن ورىندار قاراستىرىلعان. وعان قوسا، الداعى ۋاقىتتا 5 گەكتار اۋماققا ساياباق، كۆادرو جانە كارتودروم سالۋ جوسپاردا بار.

سونىمەن قاتار، زەرەندى كولىنىڭ جاعاسىندا جاڭادان سالىنعان «تاميللا» دەمالۋ بازاسى دا پايدالانۋعا بەرىلەدى. اعاشتان قاشالىپ سالىنعان 2 قاباتتى 3 كورپۋستان تۇراتىن نىساندا 26 نومەر، اسحانا جانە دەمالىپ وتىراتىن ورىندار قاراستىرىلعان.

ال «زەرەن» - دە كوتتەدج قالاشىعىن كەڭەيتىپ، اۋقىمدى شارالاردى وتكىزۋ ءۇشىن جازعى الاڭنىڭ قۇرىلىسى جوسپارلانىپ وتىر. زەرەندىنىڭ گەوگرافيالىق ەرەكشەلىگى مەن تابيعي لاندشافتىنىڭ سان- الۋاندىعى ءتۋريزمنىڭ بىرنەشە ءتۇرىن دامىتۋعا قولايلى.

قازىرگى كەزدە، مۇندا جازعى جانە قىسقى تۋريزم قارقىندى دامىپ كەلەدى. تۋريستەر مەن دەمالۋشىلارعا 38 دەن استام نىسان قىزمەت كورسەتەدى.

وتكەن جىلى تۋريستىك نىسانداردا 100 مىڭعا جۋىق ادامعا قىزمەت كورسەتىلدى. بۇل كورسەتكىش الدىڭعى جىلمەن سالىستىرعاندا 18,4 پايىزعا جوعارى. قارجىلاي العاندا 2017 -جىلى 462,2 ميلليون تەڭگە پايدا ءتۇستى.

زەرەندى اۋدانىندا تۋريزمدى دامىتۋ ءۇشىن جاڭادان سالىنىپ جاتقان «شۋچينسك- زەرەندى» اۆتوجولى سەرپىن بەرەتىنى ءسوزسىز. بۇل ءوز كەزەگىندە شاعىن جانە ورتا بيزنەستى دامىتىپ، جاڭا جۇمىس ورىندارىن اشۋعا مۇمكىندىك بەرەدى. وعان قوسا، اۋدانعا تۋريستەردىڭ اعىنىن ارتىرادى دەپ كۇتىلۋدە.

ساپارى سوڭىندا مالىك مىرزالين تۋريستىك بيزنەس وكىلدەرىمەن زەرەندى دەمالىس ايماعىن دامىتۋ ماسەلەلەرىن تالقىلادى. وندا ينفراقۇرىلىمدى دامىتۋ، قىزمەت اياسىن كەڭەيتۋ، اتتراكتسيوندارى بار ساياباق پەن سپورتتىڭ تەحنيكالىق تۇرلەرىنىڭ كەشەنىن جانە جىل بويى قىزمەت كورسەتەتىن «ىستىق بۇلاق» اشىق اسپان استىنداعى باسسەينىن سالۋ، جۇمىس ىستەپ تۇرعان تۋريستىك نىسانداردا ەمدەۋ شارالارىن وتكىزۋگە جاعداي جاساۋ، دەمالۋشىلاردىڭ قاۋىپسىزدىگى مەن تۋريستىك نىساندارعا سانات بەرۋدى جانە قىس ايلارىندا قىزمەت كورسەتۋدى قامتاماسىز ەتۋ ماسەلەلەرى ءسوز بولدى.

ايماق باسشىسى ءوڭىردىڭ سۇلۋ ءارى باي تابيعاتىنا نازار اۋداردى. اسىرەسە، زەرەندىنىڭ الەۋەتى جوعارى تۋريستىك ايماق سانالاتىنىن ايتا كەلە، قازاقستان مەن تاياۋ جانە الىس شەتەلدەردەن كەلەتىن مىڭداعان تۋريستەرگە قىزمەت كورسەتۋگە مۇمكىندىگى زور ەكەنىن اتاپ ءوتتى.

«اقمولا وبلىسىندا تۋريستەردى بۋربايدان باسقا اسەم تابيعاتى جانە باي تاريحىمەن تانىمال زەرەندى ءوڭىرى دە قىزىقتىرادى. سول سەبەپتى، زەرەندىلىكتەردىڭ الدىندا تۇرعان باستى ماسەلە، ول تۋريستىك قىزمەت ساپاسىن ارتتىرۋ»، - دەدى مالىك مىرزالين جيىندا سويلەگەن سوزىندە.

اۆتور: اسلان وسپانوۆ

سوڭعى جاڭالىقتار