سىرتقى ىستەر مينيسترلىگى قىتايدا ۇستالعان ەتنيكالىق قازاقتاردى بوساتۋدى سۇرادى

استانا. قازاقپارات - قازاقستان مەن قىتايدىڭ سىرتقى ساياسي ۆەدومستۆولارى كونسۋلدىق ماسەلەلەر تۋرالى كونسۋلتاتسيالار وتكىزدى، دەپ حابارلايدى قازاقپارات ءتىلشىسى ق ر سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ.
None
None

«وتكەن اپتادا بەيجىڭدە كونسۋلدىق ماسەلەلەر بويىنشا كەزەكتى قازاقستان- قىتاي كونسۋلتاتسيالارى ءوتتى. قازاقستان دەلەگاتسياسىن سىرتقى ىستەر مينيسترلىگى كونسۋلدىق قىزمەت دەپارتامەنتىنىڭ ديرەكتورى ارداق مادييەۆ، ال قىتاي دەلەگاتسياسىن سىرتقى ىستەر مينيسترلىگى كونسۋلدىق دەپارتامەنتىنىڭ ديرەكتورى گو شاوچۋن باسقاردى» دەلىنگەن حابارلامادا.

مالىمەتكە ساي، تاراپتار كونسۋلدىق سالاداعى ەكىجاقتى ىنتىماقتاستىقتىڭ، ەكى ەلدىڭ ازاماتتارىنىڭ قۇقىقتارى مەن مۇددەلەرىن قورعاۋدىڭ، سونداي- اق قازاقستان مەن قىتاي تۇرعىندارىنىڭ ءوزارا ساپارلارىنىڭ وزەكتى ماسەلەلەرى بويىنشا تولىققاندى كەلىسسوزدەر جۇرگىزگەن.

«قازاقستاندىق تاراپ قىتايدان قازاقستانعا قونىس اۋدارعان جانە قازاقستان رەسپۋبليكاسىنىڭ ازاماتتىعىن العان ەتنيكالىق قازاقتاردىڭ جاعدايىنا قاتىستى ماسەلەنى قوزعادى. قىتايدا قوس ازاماتتىق ءۇشىن ۇستالعان ەتنيكالىق قازاقتاردىڭ ىستەرىن وبەكتيۆتى جانە ءادىل قاراۋ مەن ولاردى بوساتۋ تۋرالى تاباندى تىلەك ايتىلدى. قىتايدىڭ شىنجاڭ- ۇيعىر اۆتونوميالىق ايماعىنداعى ەتنيكالىق قازاقتاردىڭ ماسەلەلەرىن شەشۋدىڭ ورتاق امالىن ويلاستىرۋعا ۋاعدالاستى» دەپ جازىلعان حابارلامادا.

سونىمەن قاتار، كونسۋلتاتسيالار بارىسىندا ەلدەر اراسىنداعى ۆيزالىق رەجيمدى جەڭىلدەتۋ ماسەلەلەرى تالقىلاندى. تاراپتار ەكى ەلدىڭ حالىقارالىق اۋەجايلارىندا قازاقستان جانە قىتاي ازاماتتارىنىڭ كەلۋ- كەتۋ جانە ترانزيتپەن ءوتۋ ءتارتىبى تۋرالى اقپارات الماستى.

«ۆيزالىق ساياسات سالاسىندا تۋىندايتىن ماسەلەلەردىڭ تەحنيكالىق سيپاتىن ەسكەرە وتىرىپ، تاراپتار ەكى ەل ازاماتتارىنىڭ ءوزارا ساپارلارى ءۇشىن قولايلى جاعداي جاساۋعا دايىن ەكەندىگىن ءبىلدىردى، سونداي- اق تۇراقتى كونسۋلتاتسيالاردى ودان ءارى جالعاستىرۋعا كەلىستى»، دەپ حابارلايدى سىرتقى ساياسي ۆەدومستۆونىڭ باسپا ءسوز قىزمەتى.

سوڭعى جاڭالىقتار