قازاقستاننىڭ قورعانىس ونەركاسىبى ءوندىرىسىنىڭ كولەمى ارتتى

«ستاتيستيكا كورسەتىپ وتىرعانداي، وتكەن جىلى ءبىزدىڭ كاسىپورىندارىمىز جاقسى جۇمىس ىستەدى. قورعانىس ونەركاسىبى ءوندىرىسىنىڭ كولەمى 2017-جىلى 14 پايىزعا ارتتى، ال ەكسپورت 2 ەسەگە ۇلعايدى»، - دەپ توقتالدى مينيستر.
ونىڭ سوزىنە قاراعاندا، جۇمىس ىستەگەن ۋاقىت ىشىندە مينيسترلىكتىڭ كۇش-جىگەرى سالانى ۇدەمەلى دامىتۋ ءۇشىن ينستيتۋتسيونالدىق جانە جۇيەلىك جاعدايلار جاساۋعا باعىتتالدى.
«2030-جىلعا دەيىن قارۋلى كۇشتەردى قايتا قارۋلاندىرۋ جانە قورعانىس ونەركاسىپتىك كەشەندى دامىتۋ تۇجىرىمداماسىنىڭ جوباسى ازىرلەندى (پرەزيدەنت اكىمشىلىگىنە ەنگىزىلدى). بۇل ءبىزدىڭ كاسىپورىندارىمىز بەن زاۋىتتارىمىزعا نە بەرەدى؟ بۇل قۇجاتتى قابىلداۋ ۇزاق مەرزىمدى جوبالاردى تۇزۋگە ، ياعني وندىرىسشىلەرىمىزدى اسكەري جانە قوسارلانعان ماقساتتاعى ءونىمنىڭ زاماناۋي تۇرلەرىن يگەرۋگە باعدارلاۋعا مۇمكىندىك بەرەدى»، - دەدى اتامقۇلوۆ.
ونىڭ اتاپ وتۋىنشە، تاياۋ جىلدارى ەكسپورتتىق الەۋەتى بار ءونىمنىڭ پەرسپەكتيۆالى تۇرلەرىن شىعارۋعا باستى نازار اۋدارا وتىرىپ، 9 كاسىپورىندا تەحنولوگيالىق جاڭعىرتۋ جۇرگىزۋ مىندەتى تۇر. الداعى جىلعا 2 كاسىپورىندى جاڭعىرتۋ جوسپارلانعان.
«دەگەنمەن ۇزاق مەرزىمگە بەرىلەتىن ءارى ارزان نەسيەلەردىڭ جانە تەتىكتەردىڭ جوقتىعى جۇرگىزىلىپ وتىرعان جاڭعىرتۋعا نەگىزگى تاۋەكەلدىڭ ءبىرى بولىپ وتىر. دامۋ ينستيتۋتى نەمەسە ەكىنشى دەڭگەيلى بانك بەلگىلى ءبىر شەكتەۋلەرگە بايلانىستى قورعانىس ونەركاسىپتىك كەشەن سالاسىن قارجىلاندىرمايدى. سول سەبەپتەن مەملەكەت باسشىسىنىڭ تاپسىرماسى بويىنشا قورعانىس ونەركاسىپتىك كەشەن دامىتۋ قورى قۇرىلۋدا. قور كاسىپورىندارىن قولداۋدىڭ پارمەندى تەتىگى رەتىندە جۇمىس ىستەي باستاۋى ءتيىس»، - دەدى مينيستر.