قازاقستان مەن قىتاي سالىق ساياساتىن تالقىلاۋعا كىرىستى
فورۋمنىڭ پلەنارلىق ءماجىلىسىن ق ر پرەمەر-ءمينيسترىنىڭ ورىنباسارى ەربولات دوسايەۆ اشتى.
ونىڭ ايتۋىنشا، قىتايدىڭ «ءبىر جول - ءبىر بەلدەۋ» باستاماسىن «نۇرلى جەر» مەملەكەتتىك باعدارلاماسىمەن شەبەر ۇندەستىرۋدىڭ ناتيجەسىندە قازاقستاننىڭ ترانزيتتىك الەۋەتىن كوتەرۋگە بولادى. ءبىراز جوبالاردى ىسكە اسىرىپ، جۇك اينالىمىن ارتتىرۋعا مۇمكىندىك بار.
«بيىل قازاقستاننىڭ جاڭا كەدەن كودەكسى زاڭدى كۇشىنە ەندى. بۇدان بولەك، ەۋرازيالىق ەكونوميكالىق وداقتىڭ كەدەن كودەكسى قابىلداندى. اتالعان قۇجاتتاردا سالىق پەن كەدەن سالاسىنداعى بۇعان دەيىنگى بارلىق تاجىريبەمىز ەسكەرىلدى. ءبارىڭىز جاقسى بىلەسىزدەر، قىتاي حالىق رەسپۋبليكاسىنىڭ ءتوراعاسى شي جينپيڭ استاناعا «ءبىر جول - ءبىر بەلدەۋ» باستاماسىن جاريالاعان بولاتىن. ال قازاقستان پرەزيدەنتى نۇرسۇلتان نازاربايەۆ «نۇرلى جەر» مەملەكەتتىك باعدارلاماسىن قولعا الدى.
اتالعان باعدارلاما ەلىمىزدىڭ ينفراقۇرىلىمىن دامىتۋدى كوزدەيدى. بىزدە مۇحيتقا شىعاتىن جول جوق. سول سەبەپتى ءوزىمىزدىڭ ترانيزيتتىك الەۋەتىمىزدى بارىنشا پايدالانۋىمىز قاجەت. الداعى ۋاقىتتا كولىك پەن لوگيستيكانى دامىتۋ جوبالارىنا قىرۋار قارجى بولىنەدى. دەمەك، ءوزارا ساۋدا-ساتتىق پەن ترانزيتتىڭ كولەمى ارتادى. وسىعان بايلانىستى قازىردەن باستاپ سالىق پەن كەدەن سالاسىنداعى ماسەلەلەردى پىسىقتاپ العانىمىز ءجون»، - دەپ اتاپ كورسەتتى ە. دوسايەۆ.
ايتا كەتەيىك، استاناداعى فورۋمعا بۇكىلالەمدىك كەدەن ۇيىمى، ەكونوميكالىق ىنتىماقتاستىق جانە دامۋ ۇيىمى، قىتايدىڭ مەملەكەتتىك سالىق سالۋ باسقارماسى، قازاقستاننىڭ مەملەكەتتىك كىرىستەر كوميتەتى، سونداي-اق وسى سالانىڭ ساراپشىلارى قاتىسۋدا. ءۇش كۇندىك ءماجىلىس كەزىندە ترانسشەكارالىق ساۋدا مەن ينۆەستيتسيالار ماسەلەسى، سالىق سالاسىنداعى زاڭنامانى دۇرىس پايدالانباۋ جانە ودان تۋىندايتىن پروبلەمالار، سالىق تولەۋشىلەرگە ساپالى قىزمەت كورسەتۋ، ولاردىڭ قۇقىقتارىن قورعاۋ، وسى سالاداعى دەلدالدىق قىزمەت جانە باسقا دا وزەكتى ماسەلەلەر تالقىلانادى.
اۆتور: ارمان اسقاروۆ
