نۇرسۇلتان نازاربايەۆ قازاقستاننىڭ كورشى ەلدەرمەن قارىم- قاتىناسىنا باعا بەردى
دەپ حابارلايدى قازاقپارات.
«رەسەي ءبىزدىڭ تاريحي كورشىمىز، قۇداي قوسقان كورشىمىز. بىزگە دەيىن ءومىر ءسۇردى، ءبىز دە ءومىر ءسۇرىپ جاتىرمىز، ءبىزدىڭ بالالارىمىز دا تاتۋ كورشى، دوستىق جانە ءبىر- بىرىمەن تۇسىنىستىكتە ءومىر سۇرەتىن بولادى. قازاقستان مەن رەسەي اراسىندا مەملەكەت ارالىق قاتىناستىڭ ۇلگىسى رەتىندە وتە جاقىن قارىم- قاتىناس ورناتتىق. ءبىز بۇل ۇستانىمعا ادالمىز جانە ونى ساقتاۋىمىز قاجەت. ويتكەنى بۇل قازاقستاننىڭ تۇبەگەيلى ۇستانىمدارىنا جاۋاپ بەرەدى. رەسەي ءۇشىن دە ءدال سولاي ەكەنىنە سەنىمدىمىن»، - دەدى ەلباسى.
مەملەكەت باسشىسى قازاقستان مەن قىتاي حالىق رەسپۋبليكاسى اراسىنداعى بايلانىستاردىڭ دا قارقىندى دامىپ كەلە جاتقانىن باسا ايتتى.
«ءبىز قۇرلىقتىڭ ءدال ورتاسىندا ورنالاسقان مەملەكەتپىز. ارزان كولىك ارتەرياسى سانالاتىن تەڭىزگە شىعار جولىمىز جوق. سوندىقتان قىتايمەن بايلانىستارىمىزدى قارقىندى دامىتىپ جاتىرمىز. قازىرگى ۋاقىتتا تىنىق مۇحيتىنان جۇكتەر قازاقستان ارقىلى ەۋروپاعا شىعارىلىپ جاتىر. تەمىر جول، اۆتوموبيل جولدارىن سالدىق. بۇكىل قىتايدان قازاقستان ارقىلى رەسەيگە، ەۋروپاعا شىعادى. ءبىز بولاشاقتا جۇك تاسىمالىنان عانا جىلىنا 5 ميلليارد دوللار تابىس تاباتىن بولامىز جانە تاۋارلارىمىز دا بۇل نارىققا شىعىپ وتىر»، - دەدى ق ر پرەزيدەنتى.
اۆتور: مارلان جيەمباي
