بەلدەسۋ كۇرەسىنەن تۇڭعىش رەت «حالىق بارىسى» تۋرنيرى وتەدى

استانا. قازاقپارات - العاش رەت قازاقتىڭ بەلدەسۋ كۇرەسىنەن «حالىق بارىسى» رەسپۋبليكالىق تۋرنيرى وتەدى. بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى ايتتى، دەپ حابارلايدى قازاقپارات.

 «بۇگىن - تاريحي ماڭىزى بار كۇن. نەگە دەسەڭىزدەر، «رۋحاني جاڭعىرۋ» باعدارلاماسى اياسىندا كوپتەگەن ءتول سپورت تۇرلەرىمىزدى جاڭعىرتىپ كەلەمىز. وتكەن جىلى عانا ەكسپو كورمەسى اياسىندا ءبىرىنشى رەت كوكپاردان الەم چەمپيوناتىن ۇيىمداستىردىق، باسقا دا ۇلتتىق سپورت تۇرلەرى ءوتتى. ال بۇگىن ۇسىنىپ وتىرعان كونە سپورتتىڭ ءبىر ءتۇرى - بەلدەسۋدەن «حالىق بارىسى» جوباسى ەرەكشە جوبا. بىزدە كوپ سپورت ءتۇرى بار، ونىڭ بارلىعىن جاڭعىرتۋىمىز قاجەت»، - دەدى ول.

ال ق ر ەنەرگەتيكا ءمينيسترى، حالىقارالىق قازاق كۇرەسى فەدەراتسياسىنىڭ پرەزيدەنتى قانات بوزىمبايەۆتىڭ ايتۋىنشا، «حالىق بارىسى» رەسپۋبليكالىق تۋرنيرى 7-8 - مامىر كۇندەرى الماتىدا، اشىق اسپان اياسىندا وتەدى.

 «ەلباسى نۇرسۇلتان نازاربايەۆ ءوزىنىڭ «بولاشاققا باعدار: رۋحاني جاڭعىرۋ» اتتى ماقالاسىندا «جاڭعىرۋ اتاۋلى بۇرىنعىداي تاريحي تاجىريبە مەن ۇلتتىق داستۇرلەرگە شەكەدەن قاراماۋعا ءتيىس. كەرىسىنشە، زامانا سىناعىنان سۇرىنبەي وتكەن وزىق داستۇرلەردى تابىستى جاڭعىرۋدىڭ ماڭىزدى العىشارتتارىنا اينالدىرا ءبىلۋ قاجەت. ەگەر جاڭعىرۋ ەلدىڭ ۇلتتىق- رۋحاني تامىرىنان ءنار الا الماسا، ول اداسۋعا باستايدى» دەپ كەرەمەت ايتقان. وسىعان سۇيەنە وتىرىپ، ءبىز اتا- بابالارىمىزدان مۇرا بوپ قالعان بەلدەسۋدى زامانعا ساي ەتىپ حالىققا ۇسىنباقپىز»، - دەدى قانات بوزىمبايەۆ.

ونىڭ سوزىنە قاراعاندا، «حالىق بارىسى» مادەنيەت جانە سپورت مينيسترلىگىندە رەسمي تىركەلگەن سپورت ءتۇرى سانالادى.

اۆتور: مارلان جيەمباي