ەلباسى ب ۇ ۇ قاۋىپسىزدىك كەڭەسىنە ءتوراعالىق جايىندا: قازاق دەگەن حالىق بولماسا وسى جەردە وتىرماس ەدىك

نيۋ-يورك. قازاقپارات - بۇگىن ا ق ش- قا رەسمي ساپارىن قورىتىندىلاپ، قازاقستاندىق جانە شەتەلدىك ب ا ق وكىلدەرىنە سۇحبات بەرگەن ەلباسى نۇرسۇلتان نازاربايەۆ قازاقستاننىڭ ب ۇ ۇ قاۋىپسىزدىك كەڭەسىنە ءتوراعالىعىنا قاتىستى پىكىر ءبىلدىردى، دەپ حابارلايدى قازاقپارات.

«تاريح ءۇشىن 26 جىل قاس-قاعىم ءسات. وسى جىلداردىڭ ىشىندە ءبىزدىڭ ەلىمىز ايتارلىقتاي تابىستارعا جەتتى. ءار ۋاقىتتا، وسىنداي كەزەڭدەردە مەنىڭ ەسىمدە ىلعي حالقىم، قازاعىمىز تۇرادى. قازاق دەگەن حالىق بولماسا، ءبىز قازاقتار وسى جەردە قالقيىپ وتىرماس ەدىك. پولشانىڭ ءوزىنىڭ، ورىستىڭ ءوزىنىڭ، نەمىستىڭ ءوزىنىڭ پرەزيدەنتى بار. حالقىمىزدىڭ اۋىزبىرلىگى، العا قاراي ۇمتىلۋى، جاقسىلىققا دەگەن ۇمتىلىسى وسىنداي دارەجەگە جەتكىزەدى. ارتىڭدا سونداي حالىق تۇرعاندا ەشتەڭەدەن ساسپاي جۇمىس ىستەيسىڭ»، - دەدى ق ر پرەزيدەنتى.

نۇرسۇلتان نازاربايەۆ ب ۇ ۇ قاۋىپسىزدىك كەڭەسىنىڭ ءتوراعاسى رەتىندە «جاپپاي قىرىپ-جوياتىن قارۋدى تاراتپاۋ: سەنىم شارالارى» اتتى وتىرىسىنا باسشىلىق جاساعاندا تولقىعانىن دا جاسىرمادى.

«ارينە، جاڭاعى جەردە وتىرعاندا تولقيسىڭ. قاي كەزدە قازاقتىڭ بالاسى بۇكىل الەمگە وسى جەردەن اقىل ايتىپ ەدى؟ بۇكىل الەمدە، دۇنيەجۇزىندە 200 مەملەكەت بار. 200 مەملەكەتتىڭ ىشىندە وسى قاۋىپسىزدىك كەڭەسىن باسقارعاندار كوپ ەمەس، 70-80 گە جاقىنداعان دا جوق. ءبىز وڭىردەن ەڭ ءبىرىنشى بولىپ وسىنداي دارەجەگە جەتتىك. ءوزىمىزدىڭ كوڭىلىمىزدى ايتىپ قانا قويماي، ءسوزىمىزدى وتكىزىپ كەلەمىز. سەنىم ماسەلەسىن ايتتىم، ۇلكەن ەلدەردىڭ اراسىندا سەنىم جوق»، - دەدى ەلباسى.

مەملەكەت باسشىسى ب ۇ ۇ- نىڭ باس حاتشىسىمەن كەزدەسكەنىن، ول دا ۋكراينا، سولتۇستىك كورەيا، يران پروبلەمالارىندا قازاقستاننان كومەك سۇراعانداي بولعانىن اتاپ ءوتتى.

«مۇنىڭ بارلىعى ەلدىڭ ابىرويى، ەلگە دەگەن سەنىم. سەنىم بولسا ەلگە قاراجات تا، تەحنولوگيالار دا كەلەدى»، - دەپ تۇيىندەدى ءسوزىن نۇرسۇلتان نازاربايەۆ.

اۆتور: مارلان جيەمباي