ەلباسى: قازاقستان ا ق ش- تى سەنىمدى سەرىكتەس، الەۋەتتى ارىپتەس سانايدى - كەسكىن
پرەزيدەنت نۇرسۇلتان نازاربايەۆ ا ق ش- قا رەسمي ساپارى اياسىندا اق ءۇي باسشىسى دونالد ترامپپەن كەزدەسىپ، ەكىجاقتى ستراتەگيالىق ارىپتەستىكتى تەرەڭدەتۋ جانە كۇشەيتۋ، وڭىرلىك جانە ەكونوميكالىق ىنتىماقتاستىقتى نىعايتۋ ماسەلەلەرىن تالقىلادى.
مەملەكەت باسشىلارىنىڭ قول الىسۋ راسىمىنەن كەيىن قازاقستان پرەزيدەنتى ا ق ش پرەزيدەنتى د. ترامپقا ارنايى شاقىرعانى ءۇشىن العىسىن ءبىلدىردى. سونىمەن قاتار قازاقستان ا ق ش- تى سەنىمدى سەرىكتەس، الەۋەتتى ارىپتەس سانايتىنىن، الداعى ۋاقىتتا دا ەكىجاقتى قارىم-قاتىناستى نىعايتۋ قاجەتتىگىن اتاپ ءوتتى.
«ارنايى شاقىرعانىڭىز ءۇشىن العىس بىلدىرەمىن. ءسىزدى ا ق ش پرەزيدەنتى قىزمەتىنە كىرىسكەنىڭىزگە ءبىر جىل تولۋىمەن قۇتتىقتايمىن. وسى ۋاقىت ارالىعىندا ەكونوميكالىق تۇرعىدا تابىستى جۇمىس اتقاردىڭىز. ورتالىق ازيادان اق ۇيگە ارنايى شاقىرىلعان تۇڭعىش پرەزيدەنت اتانۋىم ەكى ەل اراسىنداعى بايلانىستى نىعايتا تۇسەتىندىگىنە كامىل سەنەمىن. قازاقستان مەن ا ق ش اراسىندا ءاردايىم ەكىجاقتى ساياسي قارىم-قاتىناس ورناعان. ا ق ش تاراپى العاشقىلاردىڭ ءبىرى بولىپ قازاقستاننىڭ تاۋەلسىزدىگىن مويىندادى. سودان بەرگى 26 جىل ىشىندە ەكى ەل اراسىنداعى بايلانىس بەرىك ورنادى. مەنىڭ بۇگىنگى ساپارىم - سونىڭ ايعاعى. الداعى اڭگىمە بارىسىندا ەكى ەلگە دە ءتيىمدى ماسەلەلەردى تالقىلايمىز دەپ سەنەمىن»، - دەدى نۇرسۇلتان نازاربايەۆ.
ال دونالد ترامپ ا ق ش تاراپى قازاقستاندى ورتالىق ازيا وڭىرىندەگى بولاشاعى زور، ستراتەگيالىق ارىپتەس دەپ سانايتىندىعىن باسا ايتتى. سونىمەن قاتار قازاقستاندى وڭىرلىك بەيبىتشىلىك پەن قاۋىپسىزدىكتىڭ شەشۋشى فاكتورى رەتىندە باعالايتىنىن جەتكىزدى.
«مەنىڭ شاقىرتۋىمدى قابىل العانىڭىز ءۇشىن ريزاشىلىعىمدى بىلدىرەمىن. اق ۇيدە ءسىزدى قابىلداۋ مەن ءۇشىن ۇلكەن ابىروي. بۇعان دەيىن دە ساۋد ارابياسىندا ءبىرقاتار ماسەلەلەردى تالقىلادىق. قازاقستان تاۋەلسىزدىك العالى بەرى كوپتەگەن جەتىستىكتەرگە قول جەتكىزدى. قازىرگى تاڭدا ا ق ش ەكونوميكاسى ۇلكەن ءبىر بەلەستى باعىندىردى»، - دەدى د. ترامپ.
