قازاقستان مەن يران اقتاۋ پورتى ارقىلى جۇك تاسىمالى كولەمىن ارتتىرماق

استانا. قازاقپارات - اقتاۋ تەڭىز پورتىنىڭ وكىلدەرى قازاقستان مەن يران اراسىنداعى تەڭىز جانە پورتتار ىنتىماقتاستىعى كوميتەتىنىڭ ماجىلىسىنە قاتىستى.

بۇل تۋرالى پورتتىڭ باسپا ءسوز قىزمەتى حابارلادى دەپ جازادى tumba.kz.

قازاقستان مەن يران اراسىنداعى تەڭىز جانە پورتتار ىنتىماقتاستىعى كوميتەتىنىڭ 6-ءماجىلىسى قاراشا ايىنىڭ باسىندا يران يسلام رەسپۋبليكاسىنىڭ استاناسى تەگەراندا ءوتتى.

اتالمىش جيىنعا بايلانىستى جاريالانعان مالىمەتتەرگە قاراعاندا، يران دەلەگاتسياسىن وسى ەلدىڭ حالىقارالىق كەلىسىمدەر مەن پورت ۇيىمدارى نارىعىن دامىتۋ جانە تەڭىزدە ءجۇزۋ دەپارتامەنتىنىڭ باس ديرەكتورى حوسروۋ ساراي باستاعان.

قازاقستان تاراپىن «اقتاۋ حالىقارالىق تەڭىز ساۋدا پورتى» ۇ ك» ا ق- نىڭ پرەزيدەنتى اباي تۇرىكپەنبايەۆ باسقاردى.

شاراعا سونىمەن بىرگە اقتاۋ پورتىنىڭ كوممەرتسيالىق جانە اكىمشىلىك ماسەلەلەرى جونىندەگى باسقارۋشىسى مارتين ۆوەتمان قاتىستى.

كەزدەسۋ بارىسىندا قازاقستان مەن يران اراسىندا تاۋار اينالىمى كولەمىن ارتتىرۋ ماسەلەسى ءسوز بولدى. ناقتىراق ايتقاندا وندا ەكى ەلدىڭ پورتتارىنىڭ اراسىندا قاتىنايتىن تۇراقتى كونتەينەر قىزمەتىن جولعا قويۋ مەن ءوزارا اقپارات الماسۋ ماسەلەسىن جەتىلدىرۋ جايى تالقىلاندى. بۇعان قوسا، رەسەي، قىتايدان يرانعا تاۋار جەتكىزىپ، ولاردى پارسى شىعاناعى ەلدەرى مەن ءۇندىستانعا اپارۋ جانە ول جاقتان كەرى تاسىمالداۋ ماسەلەلەرى دە پىسىقتالدى»، - دەدى پورتتىڭ باسپا ءسوز قىزمەتىندەگىلەر.