موڭعوليادا بۇرىكتشى قىزداردىڭ سانى ارتىپ كەلەدى

استانا. قازاقپارات - موڭعولياداعى قانداستارىمىز بيىل كۇزگى بۇركىتشىلەر سايىسىن باستاپ كەتتى.

بايان-ولگي ايماعىنىڭ التاي اۋىلىندا (سۇمىن) 22 -قازان كۇنى وتكەن «التىن التاي بۇركىتى» سايىسىندا اتالعان اۋىلدىڭ بۇركىتشىسى داكەر ۇلى روم باس جۇلدەنى جەڭىپ الدى، دەپ حابارلايدى Baq.kz اقپارات اگەنتتىگى مونتسامە پورتالىنا سىلتەمە جاساپ.

ءتۇز تاعىسىن تۇلەتكەن بايقاۋعا 30 عا جۋىق قۇسبەگى قاتىسىپ، بۇركىتتى باپتاۋ، اڭعا ءتۇسىرۋ، بۇركىتتى ۇشىرۋ، قولعا قوندىرۋ، شىرعاعا شاقىرۋ قاتارلى ءتۇرلى سىناقتار بولدى.

بارلىق سىننان سۇرىنبەي وتكەن داكەر ۇلى رومنىڭ اقيىعى العاشقى ورىننان كورىنسە، ساقساي اۋىلىنىڭ بۇركىتشىسى، اساۋ ۇيرەتۋدىڭ العىرى جەڭىسبەك سەرىك ۇلىنىڭ بۇركىتى ەكىنشى ورىنعا تۇراقتادى. ال ءۇشىنشى، ءتورتىنشى، بەسىنشى ورىنداردى گۇلعايىم امانتاي، ايگەرىم اسكەر جانە زامانبول تالاپ قاتارلى مەكتەپ وقۋشىلارىنىڭ بۇركىتتەرى جەكە-جەكە يەلەندى.

بايقاعاندارىڭىزداي، بيىلعى بۇركىتشىلەر تويىندا ايشولپان نۇرعايىپ قىزىنان باسقا تاعى دا ەكى بۇركىتشى قىزدىڭ ەسىمى بەلگىلى بولدى.

ايشولپان تۋرالى "The Eagle Huntress"  دەرەكتى فيلمى جارىققا شىققالى بەرى بايان-ولگيدە بۇركىتشىلىكپەن اينالىساتىن قىزداردىڭ سانى ارتقان. قازىرگى كەزدە ايماق كولەمىندەگى التاي، التىنسوگس، بۇعىتى، ساقساي، تۇلبا اۋىلدارىندا وننان استام قاراكوز قارىنداسىمىز بۇركىت باپتاپ، ءتۇرلى سايىستارعا قاتىسىپ، اڭ اۋلاپ ءوز باقتارىن سىناپ ءجۇر.

ەستەرىڭىزدە بولسا موڭعوليادا تۇراتىن قانداسىمىز ايشولپان تۋرالى 2014 -جىلى "The Eagle Huntress"  اتتى دەرەتى فيلم تۇسىرىلگەن بولاتىن. بۇل فيلم وسكار سىيلىعىنا دا ۇسىنىلعان ەدى.