قازاقستاندا مەملەكەتتىك ءتىلدىڭ دامۋى بولىپ جاتىر - شەتەلدىك عالىم پىكىرى
مۇنداي پىكىردى ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ شاقىرىلعان پروفەسسورى ەديتا دەنست-گارسيا ءبىلدىردى، دەپ حابارلايدى قازاقپارات.
«20 جىل بويى پولشا، يسپانيا، رەسەي، فيليپپيندە ءدارىس بەرگەن مول تاجىريبەسى بار مامان رەتىندە قازاقستاننىڭ لاتىن ءالىپبيىن قولدانۋعا قاتىستى باستاماسىنا وراي پىكىرىمدى بىلدىرسەم دەپ ەدىم. 2014 -جىلدان باستاپ ل. گۋميلەۆ اتىنداعى ەۋرازيا ۋنيۆەرسيتەتىنىڭ شاقىرىلعان پروفەسسورىمىن جانە رۋي گونسالەس دە كلاۆيحو اتىنداعى يسپان ءتىلى ورتالىعىنا جەتەكشىلىك جاسايمىن. انا تىلىمەن بايلانىستى كەز كەلگەن رەفورما قوعامدىق رەزونانس، كەڭ اۋقىمدى پىكىرتالاس تۋدىرادى جانە تۋدىرا بەرەدى دە»، - دەدى ول.
شەتەلدىك عالىمنىڭ ايتۋىنشا، 2009 -جىلى يسپانيانىڭ كورولدىك ءتىل اكادەمياسى يسپان ءتىلدى ەلدەردىڭ، ا ق ش پەن فيليپپيننىڭ سايكەسىنشە اكادەميالارىمەن بىرلەسىپ، يسپان ءتىلىنىڭ جاڭا گرامماتيكاسىن، ال ءبىر جىلدان كەيىن يسپان ءتىلىنىڭ ورفوگرافياسىن باسىپ شىعارعان. مىنە سول كەزدە دە رەسمي ۇسىنىستى قولداۋشىلار دا، وعان قارسىلىق تانىتقاندار دا كوپ بولعان.
«ۇيلەسىمدى دامىعان تۇلعانىڭ قالىپتاسۋىنا بازا بولىپ سانالاتىن انا تىلىنە، ءومىردىڭ ەڭ ماڭىزدى ءساتىنىڭ بىرىنە قاتىستى جايت ءسوز بولعاندا مۇنداي رەاكسيانىڭ تۋىنداۋى زاڭدىلىق تا. مەنىڭشە، قازاقستاندا مەملەكەتتىك تىلگە قاتىستى ەۆوليۋتسيا ورىن الۋدا»، - دەدى ەديتا دەنست-گارسيا.
ونىڭ پايىمىنشا، كيريلليتسادان باس تارتۋ قاراپايىم ءارى جەڭىل بولمايدى. سەبەبى ونىڭ قازىرگى ءومىردىڭ بارلىق سالاسىنا، ءبىرىنشى كەزەكتە عىلىم مەن بىلىمگە، كوممۋنيكاتسيا مەن باسپا سوزگە تىكەلەي قاتىسى بار. دەگەنمەن، تۇپكى ماقساتقا قول جەتكىزىلگەننەن سوڭ، لاتىنعا كوشۋدەگى بارلىق قيىندىقتاردىڭ ەسەسى قايتاتىنى ءسوزسىز.
«لاتىن بۇل ينتەرنەت ءالىپبيى ەكەندىگىن اتاپ وتكەن ورىندى. سوندىقتان دا لاتىنعا كوشۋ جانە بەلگىلەر/ارىپتەر سانىن قىسقارتۋ فاكتىسىنىڭ ءوزى قازاق ءتىلىن جاھاندىق الەمدە جاڭا تەحنولوگيالاردىڭ كومەگىمەن اقپاراتتاردى جيناۋ جانە تاراتۋدا ءتيىمدى ءارى بەلسەندى پايدالانۋعا جول اشادى. قازاق ءالىپبيىن لاتىنعا كوشىرۋگە باعىتتالعان رەفورما قازاقستاننىڭ الەمدىك ءبىلىم جانە ينتەراكتيۆتى كەڭىستىككە ەنۋىنە مول مۇمكىندىكتەر جاسارىنا سەنىمىم مول»، - دەپ اياقتادى ويىن شەتەلدىك عالىم.
اۆتور: مارلان جيەمباي
