داۋرەن ابايەۆ وڭىرلىك اقپارات قۇرالدارىنىڭ باستى مىندەتتەرىن اتادى

استانا. قازاقپارات - استاناداعى «قازمەديا» ورتالىعىندا وڭىرلىك بۇقارالىق اقپارات قۇرالدارىنىڭ فورۋمى باستالدى، دەپ حابارلايدى قازاقپارات ءتىلشىسى.

«جالپى، قوعامداعى وزگەرىستەرگە ساي كوزقاراس قالىپتاستىرۋدا ايماقتىق مەديانىڭ اتقارار ءرولى ماڭىزدى. وسى ورايدا قازىرگى ايماقتىق اقپارات قۇرالدارىنىڭ الدىندا ۇلكەن ماقسات-مىندەتتەر تۇر. ول - مەملەكەت باسشىسىنىڭ باستاماسىمەن جۇزەگە اسىپ جاتقان ساياسي-ەكونوميكالىق جانە رۋحاني جاڭعىرۋ جونىندەگى كەشەندى رەفورمالارعا جۇرتشىلىقتى جۇمىلدىرۋ»، - دەدى ق ر اقپارات جانە كوممۋنيكاتسيالار ءمينيسترى داۋرەن ابايەۆ فورۋمنىڭ اشىلۋىندا.

ءمينيستردىڭ ايتۋىنشا، وتكەن جىلعى فورۋمدى ايماقتىق بۇقارالىق اقپارات قۇرالدارى تاراپىنان ءبىرقاتار ماسەلەلەر كوتەرىلگەن بولاتىن. اقپارات جانە كوممۋنيكاتسيالار مينيسترلىگى اتالعان ۇسىنىستاردىڭ ءبارىن زەردەلەپ، وڭىرلىك مەديانىڭ ساپاسىن ارتتىرۋ بويىنشا ءتيىستى شارالاردى اتقارىپ شىقتى.

اتاپ ايتقاندا، ايماقتىق بۇقارالىق اقپارات قۇرالدارىنىڭ اليانسى قۇرىلدى. بۇدان بولەك، مەملەكەتتىك تاپسىرىس اياسىندا جاسالعان ونىمدەردى وڭىرلىك ارنالارعا تاراتۋ ماسەلەسى شەشىلدى.

قازپوشتا ارقىلى باسپا ءسوزدى دامىتۋ شارالارى قولعا الىندى. «وتاندىق ماسس-مەديانى زاڭنامالىق تۇرعىدا قولداۋ ماسەلەسى دە قاراستىرىلدى. بۇگىندە مينيسترلىك دايارلاعان زاڭ جوباسى ماجىلىستە تالقىلانۋدا.

ءوز كەزەگىندە اقپارات جانە كوممۋنيكاتسيالار مينيسترلىگى وڭىرلىك ماسس-مەديانىڭ ساپاسىن ارتتىرۋعا ارنالعان كەز كەلگەن باستامانى قولداۋعا ءازىر»، - دەپ اتاپ كورسەتتى داۋرەن اسكەربەك ۇلى.

ايتا كەتەيىك، وڭىرلىك باق فورۋمى «Astana Media Week» اپتالىعى اياسىندا وتۋدە. كۇنى كەشە «Astana Digital Forum» دا ۇيىمداستىرىلدى.

اۆتور: ارمان اسقاروۆ