ورتالىق ازيا ەلدەرى قازاقستاننىڭ تابىستى ساياساتىنىڭ ناتيجەسىن كورىپ وتىر - ساراپشى
«تاۋەلسىزدىك جىلدارىندا ورتالىق ازياعا قاتىستى پرەزيدەنت نۇرسۇلتان نازاربايەۆ ۇستانىپ كەلە جاتقان ينتەگراتسيالىق ستراتەگيا ۋاقىت سىناعىنان ءوتتى. ياعني وزبەكستان مەن تۇرىكمەنستان پرەزيدەنتتەرىنىڭ ساپارلارى بۇل ەلدەردىڭ ليدەرلەرى قازاقستاننىڭ ورتالىق ازياداعى ساياساتىن وتە جوعارى باعالايتىندىعىن راستاپ وتىر. وسى ورايدا وڭىردەگى مەملەكەتتەردىڭ ەكونوميكالىق الەۋەتىن، ساياسي تۇعىرنامالارىن بىرىكتىرۋ بويىنشا ق ر پرەزيدەنتىنىڭ كۇش- جىگەرىنە اسا قۇرمەتپەن قارايدى. اتاپ ايتقاندا، وڭىرلىك بايلانىستاردى جانداندىرا تۇسۋگە ايرىقشا ءمان بەرىلىپ وتىر»، - دەپ توقتالدى ساياسي عىلىمدارىنىڭ دوكتورى.
وسى ورايدا ول وزبەكستان پرەزيدەنتى شاۆكات ميرزيەيەۆتىڭ تاشكەنتكە مەملەكەتتىك ساپارمەن كەلگەن قازاقستان پرەزيدەنتى نۇرسۇلتان نازاربايەۆتى «ەل- جۇرت قۇرمەتى» وردەنىمەن ماراپاتتاۋىنىڭ ماڭىزى زور ەكەنىن اتاپ ءوتتى.
«ەلباسى ماراپاتتالعان جوعارى ناگرادا قازاقستاندىق ساياساتتىڭ اشىق ءارى ايقىن، جۇيەلى ەكەندىگىنە بەرىلگەن باعالاۋدىڭ ءبىرى بولىپ تابىلادى. سەبەبى ەلىمىز قارىم- قاتىناستاردا شەكتەن تىس شىعاتىنداي قادامدارعا جول بەرگەن ەمەس. اتاپ وتەر جايت، ورتالىق ازيا ەلدەرى سۋ، ەنەرگەتيكا، شەكارا ماسەلەسىندە ءتۇرلى ۇستانىمدار بويىنشا تۇرالاپ قالعان كەزەڭدەردە قازاقستان شەكتەن شىعاتىنداي ۇستانىمداردان تارتىنۋعا تىرىستى. بۇل تۇرعىدا ەلىمىز ءوزارا كەلىسىمگە نەگىزدەلگەن كۇن تارتىبىنە نازار اۋدارىپ كەلدى. سول كەزدەردە پرەزيدەنت نازاربايەۆ ءوڭىر ەلدەرى ءبارىبىر دە اتالعان ماسەلەلەردە ءوزارا كەلىسىمگە كەلەتىنىن دايەكتى تۇردە ايتقان بولاتىن، سەبەبى بۇل قادامدار بارشا مەملەكەتتەر ءۇشىن ءوزارا ءتيىمدى بولادى»، - دەيدى سانات كوشكىمبايەۆ.
عالىمنىڭ سوزىنە قاراعاندا، ناتيجەسىندە، ورتالىق ازيا ەلدەرى بىرلەستىرۋشى ۇستانىمعا قاراي وزدەرىنىڭ ستراتەگياسىن وزگەرتۋدە. قازىرگى كەزدە ورتالىق ازيا ەلدەرىنىڭ كۇن تارتىبىندە سەرىكتەستىك پەن ىنتىماقتاستىقتى باستى نازارعا الاتىن ءوزارا ءىس- قيمىل تۇر.
«بۇل رەتتە ەلباسىنىڭ وزبەكستانعا ساپارى وتە كورنەكتى ءارى تابىستى بولىپ وتىر. ياعني ورتالىق ازيادا كووپەراتسيالىق، بىرلەستىرۋشى كۇن ءتارتىبىن العا جىلجىتۋ تۇرعىسىندا ءساتتى ءوتتى دەپ ايتۋعا بولادى. ەندى كەلەسى ساپار بىردەن تۇرىكمەنستاندا جالعاسىن تاپتى. بەيتاراپ تۇرىكمەنستان ءوزىنىڭ وڭىردەگى كورشىلەرىمەن سىندارلى نەگىزدە بىرلەسىپ العا جىلجۋ نيەتىن تانىتۋدا»، - دەپ توقتالدى ول.
ونىڭ ايتۋىنشا، مەملەكەت باسشىلارى ءوزارا ءتيىمدى كولىكتىك، كوممۋنيكاتسيالىق جوبالارعا، سونداي- اق تەمىر جول مەن باسقا دا سالالارداعى ىنتىماقتاستىققا ءمان بەرەدى. «وسى ەكونوميكالىق اسپەكتىلەر ايتارلىقتاي جانداندى. بۇل ءوز كەزەگىندە ورتالىق ازيادا قازاقستان ساياساتى، ستراتەگياسى تابىستىلىعىنىڭ دالەلى دەپ تولىق سەنىممەن ايتۋعا بولادى»، - دەپ تۇيىندەدى ءسوزىن سانات كوشكىمبايەۆ.
بۇدان بۇرىن حابارلانعانداي، 16 - قىركۇيەكتە وزبەكستان پرەزيدەنتى شاۆكات ميرزيەيەۆ تاشكەنتكە مەملەكەتتىك ساپارمەن كەلگەن قازاقستان پرەزيدەنتى نۇرسۇلتان نازاربايەۆتى «ەل- جۇرت قۇرمەتى» وردەنىمەن ماراپاتتادى. وسى ساپار بارىسىندا قازاقستان مەن وزبەكستان ءوزارا تاۋار اينالىمىن 5 ميلليارد دوللارعا جەتكىزۋگە ۋاعدالاسقانى بەلگىلى بولدى.
اۆتور: رۋسلان عابباسوۆ
