تالقىلاۋعا ۇسىنىلعان لاتىن ءالىپبيى سوڭعى نۇسقا ەمەس - ارىستانبەك مۇحامەدي ۇلى
بۇل تۋرالى بۇگىن مەملەكەتتىك ءتىلدىڭ لاتىن گرافيكاسىنداعى ءالىپبيىنىڭ ءبىرىڭعاي ستاندارتىن ەنگىزۋ ماسەلەلەرىنە ارنالعان دوڭگەلەك ۇستەل وتىرىسىندا ەلىمىزدىڭ مادەنيەت جانە سپورت ءمينيسترى ارىستانبەك مۇحامەدي ۇلى ايتتى، دەپ حابارلايدى قازاقپارات.
«بۇگىن ءبىز ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلاماسىنىڭ اياسىندا كورسەتىلگەن ەڭ ءبىرىنشى مىندەت، ياعني لاتىن الىپبيىنە كوشۋ جۇمىستارىن باستاۋ جونىندەگى تاپسىرماسىنا بايلانىستى جينالىپ وتىرمىز. سوناۋ تاۋەلسىزدىك تاڭىنان باستاپ، ءبىز بۇل ماسەلەگە ەرەكشە دايىندالدىق. ەندى مىنە، سىندارلى شاق تۋعاندا حالقىمىز ءۇشىن، ونىڭ ەڭ اسىل قازىناسى ءتىلىمىز ءۇشىن اسا وزەكتى جۇمىستى جۇمىلا اتقارۋدىڭ باستاۋىندا تۇرمىز. جاڭا ءالىپبي كوپشىلىك، زيالى قاۋىم، ساراپشىلار ايتىپ جاتقانداي جاڭعىرۋدىڭ ەڭ ماڭىزدى العىشارتتارىنىڭ ءبىرى. ءداۋىر سۇرانىستارىنان، زامانا قاجەتتىلىگىنەن جانە كەلەشەگىمىزدىڭ قامىنا وراي الەم حالقىنىڭ جارتىسىنان استامى قولداناتىن، قازىرگى كەزەڭدە شىن مانىندەگى حالىقارالىق الىپبيگە اينالعان لاتىنعا كوشۋ ەلباسى ايتقانداي، تەرەڭ لوگيكاسى بار ماڭىزدى قادام. بۇل تاراپتا مادەنيەت جانە سپورت مينيسترلىگى ءبىرقاتار شارا اتقاردى. بۇل ماسەلە تىلدەردى قولدانۋ جانە دامىتۋدىڭ 2011-2020 -جىلدارعا ارنالعان باعدارلاماسىندا قازاق جازۋىن ودان ارى جەتىلدىرۋ دەپ كورسەتىلگەندىگىن دە جاقسى بىلەسىزدەر»، - دەدى مينيستر.
وسى رەتتە ول 11- قىركۇيەكتە پارلامەنتتە مەملەكەتتىك ءتىلدىڭ لاتىن گرافيكاسىنداعى ءالىپبيىنىڭ ءبىرىڭعاي ستاندارتىن ەنگىزۋ ماسەلەلەرىنە ارنالعان ءبىرىنشى پارلامەنتتىك تىڭداۋ وتكەندىگىن، اتالعان شاراعا قاتىسۋشىلار ونى ءبىراۋىزدان قولداعاندىعىن اتاپ ءوتتى.
«قازىرگى ۋاقىتتا لاتىن الىپبيىندەگى قازاق ءتىلىنىڭ نۇسقاسى ۇسىنىلدى. بۇل تالقىلاۋعا ارنالعان، تۇبەگەيلى نۇسقا ەمەس. ونى قازىر بەكىتىپ جاتقانىمىز جوق. ارينە، 18 ميلليون ادامنىڭ 18 ميلليون پىكىرى بار. سوندىقتان جان- جاقتى، تىڭعىلىقتى تالقىلايىق»، - دەدى ارىستانبەك مۇحامەدي ۇلى.
اۆتور: مارلان جيەمباي
