لاتىن الىپبيىنە قاتىستى ۇتىمدى ۇسىنىس ايتاتىندار كوميسسيا وتىرىسىنا شاقىرىلادى

استانا. قازاقپارات - شايسۇلتان شاياحمەتوۆ اتىنداعى تىلدەردى دامىتۋدىڭ رەسپۋبليكالىق ورتالىعىنىڭ ديرەكتورى ەربول تىلەشوۆتىڭ ايتۋىنشا، قازىرگى كەزدە ارنايى ماماندار لاتىن ءالىپبيىنىڭ ءبىرىڭعاي نۇسقاسىنا قاتىستى بارلىق ۇسىنىستاردى قاتتاپ جاتىر، دەپ حابارلايدى قازاقپارات ءتىلشىسى.

«بىزدە اقپارات جانە مونيتورينگ دەگەن ءبولىم بار. سول جەردە ءتورت- بەس قىزمەتكەر بارلىق ۇسىنىستار مەن ەسكەرتۋلەردى باقىلاپ، حالىقتان تۇسكەن پىكىرلەردى قاتتاپ جاتىر. سونىڭ ءبارىن ءالىپبيدىڭ الەۋمەتتىك- قوعامدىق ماسەلەسىنە قاتىستى سۇراقتار دەپ ءبولىپ جاتىر. ول - ءبىر. ەكىنشى - جالپى تىلگە قاتىستى سۇراقتار. ءۇشىنشى - تۋرا الىپبيگە قاتىستى سۇراقتار. ءسويتىپ، ءۇش بلوكقا ءبولىپ، جۇمىس توبىنىڭ قاراۋىنا ۇسىنامىز»، - دەدى تىلەشوۆ بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

 ەربول ەردەنبەك ۇلى لاتىن ءالىپبيىنىڭ ءبىرىڭعاي ستاندارتىنا قاتىستى حالىق تاراپىنان سان الۋان پىكىرلەردىڭ ايتىلىپ جاتقانىنا قۋانىشتى ەكەنىن جەتكىزدى. سەبەبى بۇنىڭ ءوزى حالىقتىڭ وسى ماسەلەگە بەيقام ەمەستىگىن، جانى اشىعاننان كەيىن پىكىر ءبىلدىرىپ جاتقانىن كورسەتسە كەرەك.

 «سوندىقتان بۇل جەردە «وڭ» مەن «تەرىس» دەپ بولمەي، پىكىردىڭ قايسىسى دۇرىس، قايسىسى قونىمدى، سول جاعىن قاراۋىمىز قاجەت. ءبىز ونداي ازاماتتارىمىزعا راقمەتتەن باسقا ايتارىمىز جوق. كەرەك بولسا، سونداي ازاماتتاردى كوميسسياعا شاقىرىپ، تىڭداۋعا دايىنبىز»، - دەپ اتاپ كورسەتتى ورتالىق باسشىسى.

 ايتا كەتەيىك، كەشە ق ر پارلامەنت ماجىلىسىندە وتكەن تىڭداۋدا لاتىن ءالىپبيىنىڭ ءبىرىڭعاي نۇسقاسى تانىستىرىلدى. قازاق ءتىلىنىڭ جاڭا ءالىپبي جوباسى «ءبىر ءارىپ - ءبىر دىبىس»، «ءبىر ءارىپ - ەكى دىبىس» جانە «ءبىر دىبىس» پرينتسيپىنە نەگىزدەلگەن. 25 تاڭبالى الفاۆيتتەن بولەك 8 ديگراف بار.

اۆتور: ارمان اسقاروۆ