نۇرسۇلتان نازاربايەۆ ەكسپو كورمەسىن جابىق دەپ جاريالادى
ەلباسى ءوز سوزىندە ەكسپو كورمەسىنىڭ جوعارى دەڭگەيدە وتكەنىن جانە قازاقستاننىڭ تۋريستىك تانىمالدىلىعىن ارتتىرۋعا وڭ ىقپال ەتكەنىن ەرەكشە اتاپ ءوتتى.
«استاناداعى ەكسپو-2017 كورمەسىنىڭ جوعارى دەڭگەيدە ءارى تابىستى وتكەنىن زور ماقتانىشپەن ايتقىم كەلەدى. بۇل تاۋەلسىز قازاقستاننىڭ ابىرويىن اسقاقتاتقان ايرىقشا جەتىستىكتەردىڭ ءبىرى بولدى. ەلوردا 3 اي بويى 115 ەل مەن 22 حالىقارالىق ۇيىمنىڭ باسىن قوسقان «ەكسپو» شاعىن قالاشىعىنا اينالدى. بۇل كورمە قازاقستاننىڭ الەمگە تانىمالدىلىعى مەن تۋريستەر ءۇشىن تارتىمدىلىعىن ارتتىردى. ەلىمىزگە كەلگەن مارتەبەلى مەيماندارعا حالقىمىزدىڭ قوناقجايلىعىن كورسەتە الدىق. بولاشاقتىڭ ەنەرگياسىنا قاتىستى بۇكىل الەمنىڭ تاجىريبەسىن ءوز جەرىمىزدە توعىستىردىق. ەكسپو-2017 كورمەسىن 4 ميلليونعا جۋىق ادام ارالاپ كوردى، ولاردىڭ 2/3 بولىگى جاستار مەن وقۋشىلار ەدى. بارشانىڭ نازارىن اۋدارعان اسەم قالاشىققا كۇن سايىن 40-50 مىڭداعان ادام كەلىپ تۇردى. كورمەگە 180 ەلدەن جارتى ميلليوننان استام ادام كەلىپ، تاماشالادى. وسى ورايدا، ءاربىر التىنشى ادامنىڭ شەتەلدىك بولعانىن اتاپ وتكىم كەلەدى. ەكسپونىڭ ەڭ تانىمال ورتالىعى قازاقستاننىڭ پاۆيلونى «نۇر الەم» بولدى. كورمە باستالعاننان بەرى بۇل پاۆيلونعا 1 ميلليون 300 مىڭنان استام ادام كىرىپ-شىقتى. دۇنيەجۇزى كوز تىككەن ەكسپو بەدەلىمىزدى بيىكتەتتى، رۋحىمىزدى كوتەردى»، - دەدى مەملەكەت باسشىسى.
ايتا كەتەيىك، استانادا ەكسپو-2017 حالىقارالىق مامانداندىرىلعان كورمەسىنىڭ جابىلۋ سالتاناتىنا ارنالعان مۋلتيمەديالىق شوۋ ءوتتى. سالتاناتتى كەشتە كەلتىرىلگەن دەرەكتەرگە سايكەس، ەكسپو-2017 كورمەسىنە الەمنىڭ 180 گە جۋىق ەلىنەن 4 ميلليونعا جۋىق ادام كەلگەن. كورمە پاۆيلوندارىن جاي ارالاپ شىعۋعا 96 ساعات قاجەت بولعان. مۇندا 3500 دەن استام مادەني ۇيىمداستىرىلىپ، 33 مىڭعا جۋىق ءارتىس ونەر كورسەتكەن. كورمە اۋماعىندا 100 ميلليون فوتوسۋرەت ءتۇسىرىلىپ، 88 جىگىت ءوز سۇيىكتىلەرىنە ۇسىنىس بىلدىرگەن. سونداي-اق، ەكسپو-2017 كورمەسىندە الەم عالىمدارى ادامزات ومىرىنە ەلەۋلى وزگەرىستەر اكەلگەن 153 جاڭا ونەرتابىستى تانىستىرعان.
ەسكە سالا كەتسەك، ەكسپو-2017 حالىقارالىق مامانداندىرىلعان كورمەسى استانادا 2017-جىلدىڭ 10- ماۋسىمىندا باستالعان بولاتىن. ونداعى «بولاشاق ەنەرگياسى» تاقىرىبى ەنەرگەتيكا سالاسىنىڭ قازىرگى جاھاندىق ماسەلەلەرىن قامتيدى. كورمەگە بالامالى ەنەرگيا كوزدەرى سالاسىنداعى جاڭا تەحنولوگيالاردى ۇسىنعان 115 مەملەكەت جانە 22 حالىقارالىق ۇيىم قاتىستى.
ەكسپو-2017 اۋماعىنداعى امفيتەاتردا قازاقستاننىڭ ەسترادا جۇلدىزدارىنىڭ كونسەرتتىك باعدارلاماسى ءوتتى. كورمە 11- قىركۇيەك كۇنى تۇنگى 03:00 تە تولىعىمەن جابىلادى.
