ساعىنتايەۆ قازاقستانداعى «جاسىل» ەنەرگەتيكانىڭ كەلەشەگى تۋرالى ايتتى
«شىنىمەن دە، ءبىزدىڭ كوز الدىمىزدا جاھاندىق ەنەرگەتيكالىق نارىقتىڭ جاڭا مودەلىنە اۋىسۋدىڭ بىرەگەي پروتسەسى قارقىن الۋدا. ءبىز تۇراقتى ەنەرگەتيكالىق دامۋدى قامتاماسىز ەتۋدىڭ ماڭىزدىلىعى، ەكونوميكالىق ورلەۋ مەن ەكوجۇيەنى ساقتاۋدىڭ اراسىنداعى تەڭگەرىمى يدەياسىن قولدايمىز»، - دەپ توقتالدى ق ر پرەمەر-ءمينيسترى.
وسى ورايدا ب. ساعىنتايەۆ الەمدىك ەنەرگيالىق جۇيەنىڭ جاڭا مودەلىنە اۋىسۋ شارالارى بىركەلكى ىسكە اسىرىلىپ جاتقانىن جەتكىزدى.
دەگەنمەن، الەم ەلدەرى بۇعان دەيىن بولماعان جاڭا سىن-قاتەرلەرگە تاپ بولۋدا، سونىڭ ىشىندە ەنەرگيانىڭ جاڭا كوزدەرىنىڭ ەكپىندى دامۋى دا بار.
«الەمنىڭ كەيبىر وڭىرلەرىندە ەنەرگيا تاپشىلىعىنىڭ ساقتالۋى مەملەكەتتەردىڭ ەكونوميكالىق ءوسىمى مەن حالىقتىڭ ءال-اۋقاتىنا نۇقسان كەلتىرۋدە. سۋتەكپەن، يادرولىق سينتەزبەن، بيووتىنمەن جانە باسقالارىمەن بايلانىستى ەنەرگەتيكانىڭ جاڭا نارىقتارىن پايدالانۋ كەزىندە قاۋىپسىزدىك ماسەلەسى اشىق كۇيىندە قالۋدا»، - دەپ اتاپ ءوتتى ۇكىمەت باسشىسى.
سونىمەن قاتار ب. ساعىنتايەۆ كليماتتىڭ وزگەرۋى پروبلەماسىنىڭ ماڭىزدىلىعىن ۇمىتپاۋ كەرەكتىگىن ءسوز ەتتى.
ونىڭ سوزىنە قاراعاندا، استاناداعى «ەكسپو-2017» كورمەسى ەنەرگەتيكانىڭ بولاشاعى بۇگىننەن باستاپ ايقىندالاتىنىن كورسەتىپ وتىر.
«قاتىسۋشى مەملەكەتتەر تانىستىرعان جاڭا تەحنولوگيالار مەن ستراتەگيالار بۇگىننىڭ وزىندە جاڭا نارىقتاردى قالىپتاستىرۋدا، يندۋستريانى ترانسفورماتسيالاۋدا.
اتاپ ايتقاندا، «ەكسپو-2017» مۇراسى الەمدىڭ ەنەرگيا جۇيەسىن دامىتۋعا جانە جاھاندىق ەنەرگەتيكانى تۇراقتى تۇردە جەتىلدىرۋدە تىڭ مودەلدەردى قۇرۋعا قۋاتتى سەرپىن بەرەتىنىنە سەنىمدىمىن. ءبىز ب ۇ ۇ- نىڭ نەگىزگى باستامالارىن، پاريج كليماتتىق كەلىسىمىن قولدايمىز.
«ەكسپو-2017» كورمەسىنىڭ بازاسىندا «بولاشاق ەنەرگياسى» تەحنولوگيالار مەن ينۆەستيتسيالار حالىقارالىق ورتالىعىنىڭ جۇمىسى باستاۋ الادى. بۇل ورتالىق ورتالىق ازيادا «جاسىل» ەكونوميكاعا كوشۋ ماقساتىندا ب ۇ ۇ- مەن جانە ە ى د ۇ ەلدەرىمەن ىنتىماقتاستىقتى قامتاماسىز ەتۋگە مۇمكىندىك بەرەدى»، - دەپ تۇيىندەدى ءسوزىن ول.
اۆتور: رۋسلان عابباسوۆ
