قازاقستان مەن قىتايدىڭ بىرلەسكەن كاسىپورىندارى كوبەيدى
بۇل تۋرالى قىتاي حالىقارالىق ساۋدانى دامىتۋ كوميتەتى ءتوراعاسىنىڭ ورىنباسارى، قىتاي پاۆيلونىنىڭ كوميسسارى ۋاڭ جينجەن ەكسپو- دا وتكەن سەمينار بارىسىندا ءمالىم ەتتى.
«وسىدان ءتورت جىل بۇرىن، 2013 -جىلدىڭ 7 - قىركۇيەگىندە استاناداعى نازاربايەۆ ۋنيۆەرسيتەتىندە ق ح ر ءتوراعاسى شي جينپيڭ جىبەك جولى ەكونوميكالىق بەلدەۋى تۋرالى العاش رەت باستاما كوتەردى. سول جىلى 3 - قازاندا ق ح ر ءتوراعاسى يندونەزيادا سويلەگەن سوزىندە تەڭىز جىبەك جولى ستراتەگياسىن قۇرۋدى ۇسىندى. وسىلايشا، «ءبىر بەلدەۋ، ءبىر جول» باستاماسىنىڭ نەگىزى قالاندى. بۇگىن ءتورتجىلدىق جۇمىستى كىشىگىرىم قورىتىندىلاۋ ءۇشىن ەكسپو-2017-دەگى قىتاي پاۆيلونىنا جينالىپ وتىرمىز»، - دەدى ول.
پاۆيلون كوميسارىنىڭ ايتۋىنشا، قازاقستان - «ءبىر بەلدەۋ، ءبىر جول» ستراتەگياسىنىڭ وتانى جانە وعان قولداۋ بىلدىرگەن العاشقى مەملەكەت. «ق ح ر ءتوراعاسى شي جينپيڭ قازاقستانعا بارعان ساپارىندا ق ر پرەزيدەنتىمەن «ءبىر بەلدەۋ، ءبىر جول» جانە قازاقستاندىق «نۇرلى جول» ستراتەگيالارىن ۇيلەستىرۋ تۋرالى كەلىسىمگە كەلدى. ال 2016 -جىلى قازاقستان مەن قىتايدىڭ پرەمەر- مينيسترلەرى بىرلەسكەن ىنتىماقتاستىق تۋرالى كەلىسىمدى بەكىتتى. وسىلايشا، ستراتەگيا اياسىندا قازاقستان مەن قىتاي ءتۇرلى سالالار مەن دامۋ باعىتتارى بويىنشا ءباتۋالاستىققا قول جەتكىزىپ، ەكى ەل كاسىپورىندارى ءۇشىن جاڭا بيزنەس- مۇمكىندىكتەرگە جول اشتى»، - دەيدى ۋاڭ جينجەن.
قىتايلىق كوميتەت وكىلى كەلتىرگەن دەرەكتەرگە سايكەس، 2016 -جىلى بىرلەسكەن قازاق- قىتاي كاسىپورىندارىنىڭ سانى 668- ءدى قۇراعان. بۇل كورسەتكىش 2013 -جىلمەن سالىستىرعاندا 35 پايىزعا كوپ. سونداي- اق، ستراتەگيا اياسىندا CNPC سەكىلدى تانىمال قىتايلىق كومپانيالار قازاقستاندا ءوز وكىلدىكتەرىن اشۋ مۇمكىندىگىنە يە بولعان. بىرلەسكەن قازاق- قىتاي جوبالارىن جۇزەگە اسىرۋ اياسىندا قازاقستاندىق- قىتايلىق كومپانيالار 27 ميلليارد ا ق ش دوللارى كولەمىندەگى تاۋار اينالىمىنا قول جەتكىزدى. 2015 -جىلى قىتاي قازاقستان ارقىلى وتەتىن جۇردەك پويىزىن ىسكە قوستى. قازىرگى ۋاقىتتا ءدال وسى پويىز ارقىلى تاسىمالداناتىن تاۋار اينالىمىنىڭ كولەمى 8 ميلليون توننادان اسادى.
2017 -جىلدىڭ اقپان ايىندا العاش رەت قازاقستاننىڭ بيدايى قىتاي ارقىلى وڭتۇستىك- شىعىس ازيا ەلدەرىنە ەكسپورتتالدى. سونىمەن بىرگە، كوميسسار ەكسپو-2017 كورمەسىنىڭ مۇمكىندىكتەرىن پايدالانىپ، ەكى ەل اراسىنداعى ءوزارا قارىم- قاتىناستى جانداندىرا ءتۇسۋدى ۇسىندى. «ەكسپو-2017 - ورتالىق ازيادا وتكىزىلگەن العاشقى كورمە. وعان قىتاي مەن قازاقستان باسشىلىعى ەرەكشە ءمان بەرەدى. 8 - ماۋسىم كۇنى ق ح ر ءتوراعاسى مەن ق ر پرەزيدەنتى قىتاي پاۆيلونىنا بارىپ، 6 ميلليارد ا ق ش دوللارى بولاتىن ىنتىماقتاستىق تۋرالى كەلىسىمگە قول قويدى. قىتاي پاۆيلونى ءۇش ايدا 23 اپتالىق وتكىزىپ، ءوز ايماقتارىن تانىستىردى. اتالعان شارالار بارىسىندا 60-تان استام كەلىسىم مەن مەموراندۋمدار بەكىتىلىپ، ىنتىماقتاستىق نىعايا ءتۇستى»، - دەپ تۇيىندەدى ءسوزىن ۋاڭ جينچجەن.
اۆتور: ايجان سەرىكجان قىزى
