قازاقستاننىڭ ەلەكتروندىق ۇكىمەتىنە قىرعىز دەلەگاتسياسى قىزىعۋشىلىق تانىتتى

استانا. قازاقپارات - استانادا تاجىريبە ءبولىسۋ شەڭبەرىندە قازاقستاندىق جانە قىرعىز تاراپتارىنىڭ ەلەكتروندىق كورسەتىلەتىن مەملەكەتتىك قىزمەتتەر تاجىريبەسىن زەرتتەۋ تاقىرىبىنداعى كەزدەسۋ ءوتتى، دەپ حابارلايدى «ۇلتتىق اقپاراتتىق تەحنولوگيالار» ا ق- نىڭ باسپا ءسوز قىزمەتى.

دەلەگاتسيا قۇرامىندا قىرعىز رەسپۋبليكاسى ادىلەت مينيسترلىگىنىڭ جانە «زاڭنامانى دامىتۋ ورتالىعى» قوعامدىق قورىنىڭ وكىلدەرى بولدى. كەزدەسۋ اياسىندا قوناقتارعا قازاقستاننىڭ ەلەكتروندىق ۇكىمەت جانە اشىق ۇكىمەتتىڭ قىزمەتتەرى تانىستىرىلدى.

قىرعىز رەسپۋبليكاسى ادىلەت ءمينيسترىنىڭ ورىنباسارى م. سارىمساقوۆ قىرعىزستان ءۇشىن قازاقستان تاجىريبەسىنىڭ ماڭىزدى ەكەنىن اتاپ ءوتىپ، ەلدە مەملەكەتتىك قىزمەتتەردى اۆتوماتتاندىرۋ پروتسەسىنىڭ باستالعاندىعىن ايتتى.

ايتا كەتەرلىگى، وتاندىق ەلەكتروندىق ۇكىمەت پورتالىنىڭ تانىمالدىلىعى كۇن ساناپ ارتىپ كەلەدى، رەسۋرسقا تىركەلگەن پايدالانۋشىلاردىڭ سانى 6 ميلليوننان استى. بۇگىنگى كۇندە eGov.kz ارقىلى 237 قىزمەت پەن سەرۆيس كورسەتىلىپ كەلەدى، ونىڭ ىشىندە 30 قىزمەتتى ەلەكتروندىق سيفرلىق قولتاڭباسىز ءبىر رەتتىك قۇپيا ءسوز كومەگىمەن الۋعا بولادى.

قىرعىز دەلەگاتسياسى ح ق ك و مەن ارنايى ح ق ك و- نىڭ جۇمىسىمەن تانىستى.