نۇرسۇلتان نازاربايەۆ پەن اندجەي دۋدا كەڭەيتىلگەن قۇرامدا كەلىسسوزدەر وتكىزدى
كەلىسسوزدەر بارىسىندا مەملەكەت باسشىسى وتكەن جىلعى تامىز ايىنداعى ۆارشاۆاعا ساپارىن ەسكە الىپ، پولياك حالقى مەن ەل پرەزيدەنتى دۋدا جىلى قابىلدانعاندىعىن اتاپ ءوتتى.
«بۇل ءبىزدىڭ قارىم-قاتىناسىمىزداعى ماڭىزدى وقيعا بولدى. ۆارشاۆادا وتكەن قازاقستاندىق-پولشالىق بيزنەس فورۋمدا سوماسى 2 ميلليارد دوللارعا جۋىقتايتىن 15 كوممەرتسيالىق قۇجاتقا قول قويىلدى. ءسىزدىڭ وتىنىشىڭىزبەن 29- مامىردا استانا مەن ۆارشاۆا اراسىنداعى تۇراقتى اۋە رەيسى اشىلدى. پولياك تارابىنان تاسىمالداۋشى - «لوت» اۋە جەلىسى. سىزبەن شاعىن قۇرامداعى كەلىسسوزدەر بارىسىندا ەكى تاراپتى دا قىزىقتىراتىن وڭىرلىك، جاھاندىق ماسەلەلەردى تالقىلادىق. قازاق-پولياك ىنتىماقتاستىعى تابىستى ىلگەرىلەي تۇسۋدە»، - دەدى ەلباسى.
نۇرسۇلتان نازاربايەۆ وتكەن جىلى قازاقستاندا پولياك كاپيتالىنىڭ قاتىسۋىمەن 100 ميلليون دوللاردىڭ 10 جاڭا كاسىپورنى اشىلعاندىعىن، پولشا ەلىمىزدىڭ ەكونوميكاسىنا 1 -جىلدا 207 ميلليون دوللار سالعاندىعىن ايتتى.
«بۇگىن بىرلەسەن بيزنەس فورۋم وتەدى. ءبىزدىڭ مينيسترلەرىمىز، سايكەسىنشە كومپانيالارىمىز سىزگە زاڭنامامىزدىڭ شارتتارىن كەڭىنەن ايتىپ بەرەتىن بولادى. شەتەلدىك ينۆەستورلارمەن جانە وزگە ەلدەرگە قارجى سالاتىن ءبىزدىڭ ينۆەستورلارمەن جۇمىس ىستەيتىن KAZAKH INVEST دەپ اتالاتىن ارنايى ورگان قۇرىلدى. 2017-جىلدان باستاپ پولشا مەن قازاقستان اراسىندا ۆيزاسىز رەجيم ەنگىزىلدى. كورمە اياقتالعاننان كەيىن «استانا» حالىقارالىق قارجى ورتالىعى جۇمىس ىستەيتىن بولادى. ءبىز ءتىپتى كونستيتۋتسياعا وزگەرتۋ ەنگىزدىك. ول جەردە اعىلشىن قۇقىعى، اعىلشىن ءتىلى جۇمىس ىستەيدى. بارلىق قارجى ينستيتۋتتارى وسى حالىقارالىق قارجى ورتالىعىمەن جۇمىس ىستەۋگە كەلىسىپ وتىر. سىزدەردى دە شاقىرامىز»، - دەدى قازاقستان پرەزيدەنتى.
ءوز كەزەگىندە پولشا پرەزيدەنتى اندجەي دۋدا قازاقستان پرەزيدەنتىنە شاقىرتۋى ءۇشىن ريزاشىلىعىن ءبىلدىردى.
«استاناداعى كورمەنى كورۋ مۇمكىندىگى ءۇشىن، ەرتەڭ پولشانىڭ ۇلتتىق كۇنىنە قاتىسۋ مۇمكىندىگىن بەرگەنىڭىز ءۇشىن العىسىمدى بىلدىرەمىن. ەرتەڭ پولياك، سونىمەن قاتار قازاقستاندىق پاۆيلوندى كورەتىن بولامىن. بۇل جاڭاراتىن ەنەرگيا، سونىمەن بىرگە ءداستۇرلى شيكىزات كوزدەرىمەن بايلانىستى زاماناۋي تەحنولوگيالاردى كورسەتۋدىڭ بىرەگەي مۇمكىندىگى»، - دەدى پولشا پرەزيدەنتى.
اۆتور: مارلان جيەمباي
