نۇرسۇلتان نازاربايەۆ: ءوزىن-ءوزى جۇمىسپەن قامتۋ - سالىقتان تىكەلەي جالتارۋ
«بۇكىل الەمدە ساقتاندىرۋ - ازاماتتاردى الەۋمەتتىك قورعاۋدىڭ ماڭىزدى تاراپى، ال ساقتاندىرۋ ۇيىمى - ءىرى ينۆەستور. ءبىزدىڭ ەلىمىزدە دە ساقتاندىرۋدى دامىتۋ، ساقتاندىرۋ قىزمەتىنىڭ قولجەتىمدىلىك دەڭگەيىن كوتەرۋ قاجەت. بۇل رەتتە مەديتسيناداعى ساقتاندىرۋ دا قالىپ قويماۋى ءتيىس. بۇل پروگرەسسيۆتى باعىت، تۇپتەپ كەلگەندە بىزگە العا جىلجۋ كەرەك. (...) قازىر قورعا سالىمدار ءتۇسىپ جاتىر. جاقىن كەلىپ قاراعانىمىزدا ول جەردە ماسەلەنىڭ از ەمەستىگى انىقتالدى. بىزدە ءوزىن-ءوزى جۇمىسپەن قامتىعان 2,7 ميلليون ادام بار ەكەن. بارلىق ۋاقىتتا دا الەۋمەتتىك قورعاۋ مينيسترلەرىنەن «الەمدە «ءوزىن-ءوزى جۇمىسپەن قامتىعان» ءسوزى قايدا بار؟» دەپ سۇرايمىن. بۇل سالىق تولەۋدەن تىكەلەي جالتارۋ. «ءوزىن-ءوزى جۇمىسپەن قامتۋ» دەگەنىمىز وسى»، - دەدى ق ر پرەزيدەنتى.
وسى ورايدا مەملەكەت باسشىسى ءوزىن-ءوزى جۇمىسپەن قامتىعاندارعا مەملەكەت قالاي كومەك كورسەتەتىندىگىن ءتۇسىندىرىپ ءوتتى.
«ءبىز جۇمىسسىزدار ءۇشىن شەشىم قابىلدادىق، ەگەر جۇمىسىڭ بولماسا، وندا اۋىلدا شاعىن نەسيە بەرەمىز. ەكى سيىر ساتىپ الىپ، سات نەمەسە باقشا ءوسىرىپ، مەملەكەتكە تولە. جاقسى جۇمىس ىستەسەڭ، كەلەسى جىلى 5 ەسە (شاعىن نەسيە) بەرەمىز. ال مۇنىمەن كىم اينالىسقىسى كەلمەي قالاعا بارسا، وندا تەگىن وقىتىپ، جۇمىسقا تۇرعىزامىز»، - دەدى ەلباسى.
سونىمەن قاتار پرەزيدەنت مەديتسينالىق ساقتاندىرۋعا كوشۋگە ءالى ەرتە ەكەندىگىن ەسكەرتتى.
«بىزدە مۇنداي ماسەلەلەر بار كەزدە مەديتسينالىق ساقتاندىرۋعا كوشەمىز دەپ نەسىنە ايتاسىزدار؟ الدىمەن ماسەلەنى شەشىپ الايىق. ماسەلە شەشىلگەننەن كەيىن سىزدەرمەن جانە پارلامەنتپەن بىرلەسىپ ورتاق شەشىم قابىلدايمىز»، - دەدى ەلباسى دەنساۋلىق ساقتاۋ ءمينيسترى ەلجان ءبىرتانوۆقا قاراتا.
اۆتور: مارلان جيەمباي
