ق ر ۇلتتىق ەكونوميكا ءمينيسترى تەڭگە باعامىنا قاتىستى تۇسىنىك بەردى
«ەكى جىلدان بەرى تەڭگە ەركىن باعام دەڭگەيىندە، سايكەسىنشە ءبىزدىڭ تەڭگەنىڭ كەز كەلگەن شەتەل ۆاليۋتاسىنا باعامىن نارىق كۇشى انىقتايدى. نارىققا كوپتەگەن جاعدايلار اسەر ەتۋى مۇمكىن. مەنىڭ ويىمشا، قانداي دا ءبىر قۇبىلمالى احۋالعا عانا نازار اۋدارۋدىڭ رەتى جوق. بۇنداي قۇبىلىستار بايقالىپ تۇرادى. تەڭگە ەركىن باعامعا جىبەرىلگەننەن كەيىن تۇراقتى دەڭگەيدە تۇر جانە وسىنى ەڭ باستى جاعداي دەپ سانايمىن. ءبىز وسىعان ۇيرەنۋىمىز كەرەك، سوندىقتان باعامدى كۇن سايىن نەمەسە اپتا سايىن ەمەس، ايمەن، توقسانمەن جانە جارتىجىلدىقپەن ولشەۋ كەرەك»، - دەدى مينيستر.
بۇدان بولەك ت. سۇلەيمەنوۆ ەۋرو باعامىنىڭ ءوسۋى ماسەلەسىنە دە توقتالدى.
«ەۋرو اينالىسىنداعى احۋالعا توقتالساق، بۇل تۇرعىدا ۆاليۋتالىق جۇپتار بار ەكەنى بەلگىلى. بارلىعىمىز ەۋروپالىق وداقتا نە بولىپ جاتقانىن بايقاپ ءجۇرمىز. ياعني بۇل جاعدايلار ەۋروعا شاققاندا تەڭگەنىڭ السىرەۋى قوزعالىسىن بىلدەرمەيدى، وسى ورايدا ەۋرونىڭ باسقا ۆاليۋتالارعا، ونىڭ ىشىندە دوللارعا شاققانداعى باعامىنىڭ كۇشەيگەنىن بايقاتۋى ىقتيمال. ە و- دا ەكونوميكاداعى، جۇمىسسىزدىق سالاسىندا ايتارلىقتاي جاقسى جاڭالىقتارعا بايلانىستى احۋال وزگەرىپ تۇرادى. سوندىقتان دا بۇل تاقىرىپتا ۆاليۋتالىق جۇپتارعا نازار اۋدارعان ءجون»، - دەپ ءتۇسىندىردى ۆەدومستۆو باسشىسى.
مۇنىمەن قوسا مينيستر رەسەيلىك رۋبلدىڭ ەلىمىزدىڭ ۇلتتىق ۆاليۋتاسىنا ىقپالى جايىندا تۇسىنىك بەردى.
«شىن مانىندە رەسەيلىك ارىپتەستەر جاقىندا وزدەرىنىڭ ماكروەكونوميكالىق بولجامىنىڭ ءبىر بولىگىن جاريالادى. قازىرگى كەزدە بولجام جاڭارتىلىپ، رۋبل 62 (دوللارعا شاققاندا) دەڭگەيىندە تۇر. مەنىڭ ويىمشا، مۇناي باعاسىنا قاتىستى جانە رەسەي ەكونوميكاسىنىڭ دامۋىن ەسكەرە وتىرىپ، ولار وزدەرىنىڭ كورسەتكىشىن ايقىندادى. سوندىقتان رۋبل باعامىنىڭ كۇرت وزگەرىستەرى بولمايدى. بۇل تۇرعىدا ءبىز ءبىر پاراديگمادا جىلجىپ كەلەمىز»، - دەدى مينيستر.
اۆتور: رۋسلان عابباسوۆ